外形硬朗的韓星池珍熙原來相當貪靚，早前來港拍戲與張家輝及崔始源合作，為免拍埋「爆肌」張家輝及型男崔始源而失分輸蝕，他在港拍攝期間積極減肥，最終因減肥過度而一度暈倒，需Call白車送院，幸無大礙！

為保Fit爆身形，貪靚的池珍熙來港拍戲期間「冇啖好食」，真陰功！

化身小粉絲的Mandy成功埋池珍熙身，並成功與偶像握手！

張家輝表示「見證」池珍熙暈低，唔通係畀你啲肌肉嚇親？（資料圖片）

池珍熙（右）早前來港與型男崔始源（左）拍戲，並積極減肥。（資料圖片）

主演《大長今》的韓星池珍熙前晚於香港出席《歐米茄「A Tale of Perfection」展覽》開幕，一到場即迷倒不少靚女，但原來他跟靚女一樣貪靚，早前還減肥減到暈。據知，池珍熙早前來港與張家輝及韓星崔始源等拍新片，但留港期間對美食毫不動容，出席飯局時常「齋睇唔食」或只淺嘗數口！由於節食過度，他曾一度在港暈倒，需Call救護車送院，醫生診斷為低血糖，經調理後最終無大礙，他其後即投入工作。

怕老婆唔（目及）女

記者就池珍熙在港拍戲暈倒一事致電張家輝，他證實對方曾暈倒：「點會唔知？佢喺我面前暈低。（你知唔知佢餓到暈？）人哋嘅嘢我唔多講啦！只係當時見到佢暈低都嚇一嚇，即刻上前扶佢，劇組都即刻送佢去睇醫生。」電影現已完成，池珍熙前晚在香港出席腕錶活動，同場有名模Mandy Lieu，問到獲性感的Mandy Lieu青睞感覺如何時，已婚的池珍熙即搞鬼地以雙手做出目不斜視的動作，並說：「完全睇唔到佢，佢太靚，唔敢望！（驚太太呷醋？）唔會唔驚！」

池珍熙又識做地表示珍藏了不少腕錶，最貴的一隻是送給愛妻：「結婚當日，紀念日同生日都送她手錶！」他解釋因手錶機芯組件代表完整家庭。他透露今次來港曾與張學友、楊紫瓊及導演劉偉強食飯，但沒有洽談合作，卻希望跟劉偉強合作，並想拍套類似《無間道》題材的電影。

姓名：池珍熙

年齡：42歲

出生日期：1971年6月24日

身高：1米78

妻子：李秀妍（2004年結婚）

代表作：2003年與李英愛合演的電視劇《大長今》爆紅，憑閔政浩一角在亞洲地區人氣急升，其「閔大人」形象至今仍深入民心，成為「師奶殺手」。其他代表作包括陳可辛執導的電影《如果．愛》及韓劇《同伊》。