樂壇已死論近年不絕於耳，音樂人周啟生亦狠批樂壇「患癌」，但仍有初生之犢滿腔熱誠向前衝。英皇力捧的新人許靖韻（Angela）雖然仍然在學，但已急不及待出碟做歌手。大學主修金融的她寧願放棄光明「錢」路，只因為了唱歌，她可以去到好盡。

兼顧讀書和工作的Angela堅持完成學業，證明入娛樂圈都可以有高學歷。

主修金融的Angela選擇以歌手作為職業，賭上光明「錢」路，但內心得到的滿足無法可比。

當年還是肥妹仔一名的Angela（左）參加新秀比賽，已跟大師姐祖兒結緣。

Angela在《超級經理人》中以三點式上陣，又與泳兒以空姐Look參演《歲月如歌》微電影，形象百變。

許靖韻

現年20歲的Angela於2010年參加新秀歌唱比賽被英皇發掘，熱愛唱歌的她接受3年訓練後終於夢想成真，今年獲唱片公司重點力捧，早前跟杜汶澤和蔡卓妍等師兄師姐拍攝電影《超級經理人》，又參演微電影《歲月如歌》兼獻唱主題曲，日前更推出處女大碟，事業剛起步已一帆風順。最愛「四圍唱」的Angela自爆當年參加新秀時是「重量級」參賽者：「我超級鍾意唱歌，14歲初中開始就不停參加歌唱比賽，中五會考後去咗參加新秀，嗰時係肥妹一名，差唔多140磅！依家就減到100幾磅。」

「錢」途作賭注

獲唱片公司賞識的Angela接受一連串的訓練，當時仍讀預科的她除了上學之外就是工作，忙於學唱歌及出席不同活動吸收經驗，有別於一般學生放學後去Shopping、睇戲，但她直言絕不後悔：「我未簽公司之前嘅課外活動都係唱歌，所以簽約後有得唱歌仲開心！惟有犧牲瞓覺時間兼顧讀書同做嘢，不過做自己鍾意做嘅嘢係值得嘅！」Angela現時就讀大學二年級，不時要和同學合作做報告，工作多多的她感激同學體諒：「啲同學會一早問定我邊日得閒就晒我，例如我夜晚8點先收工，佢哋就約9點先傾Project，我惟有請佢哋食糖水報答番。」

Angela在大學主修金融，愛Sing如命的她寧願放棄大好「錢」途而選擇做歌手：「讀金融可以學識儲錢，將來賺到錢都知點投資，不過我太鍾意唱歌，如果畀我揀多次嘅話，我都會揀唱歌，我覺得做自己鍾意做嘅嘢更重要，其實唱歌都可以搵到錢，屋企人都冇反對我做歌手。」

下一站個唱

如今Angela「Sing」夢成真，如願出碟做歌手，深受美國女歌手Christina Aguilera影響的她坦言以偶像為榜樣，希望任何曲風都能應付自如。身為公司的小師妹，Angela萬千寵愛在一身，亦把握機會向一眾師兄師姐學習，她坦言師姐容祖兒是其學習對象，下定決心要像師姐般愈唱愈強，而祖兒亦毫不吝嗇地向Angela過兩招：「有一次見到師姐，佢同我講要學識堅持，我嗰排錄緊歌但開始懷疑自己，係咪應該要繼續落去，但佢鼓勵我話堅持就可以過到，呢番話令我好深刻！」如今證明Angela的堅持並沒白費，出碟後她下一個目標是開個人演唱會，更定下10年內進軍紅館的目標，誓要讓全港市民能「靖」聽美妙歌「韻」！

後記：有Heart．因為愛

專訪當日是Angela舉行處女大碟的發布會的日子，場內貼滿她的海報，發布會完結後Angela緊張地着工作人員收集海報，連大型布景都不放過，統統妥善收好帶回家留為紀念，可見靜待三年的她對能夠出碟有多興奮！拍照時她爽快地按記者要求擺出不同甫士，絲毫沒有舉行發布會過後的疲態，希望她能夠保持這份對出碟的熱誠及專業的態度，愈唱愈強！