杜德偉（Alex）與比他年輕24歲的嫩妻Ice Lee結婚差不多一年，大前日兩公婆到中環拍拖撐枱腳，醫肚後Alex隨即拖實老婆離開，穿上鬆身衫及平底鞋的杜太身形明顯比以前圓潤，孕味甚濃！

Alex一手拖篋一手拖實圓潤老婆，Man爆！

Alex和老婆到食店撐枱腳，大晒恩愛。

現年51歲的杜德偉（Alex）去年11月迎娶比他年輕24歲、任職攝影師的女友Ice，女家父母在婚禮上更送上「金豬頸鏈」給Alex做「嫁妝」，寓意盡快開枝散葉。

大前日下午5時許，Alex與老婆戴上情侶黑超在中環一間餐廳撐枱腳，邊食邊傾，差不多吃完時，Ice見老公飲完飲品，即體貼地將自己那杯遞給老公，Alex即拿起飲管大啖啜，十分恩愛。期間有食客認出Alex，拿出紙筆上前要求簽名，他亦有求必應，態度親切。埋單後，Alex一手拖着老婆，一手推着行李步出，身穿鬆身衫及平底鞋的杜太，身形明顯比以前圓潤不少，孕味十足！其後兩人手拖手步往附近的機鐵站離開。

心情靚食量增

昨日記者致電Alex，問到太太是否有喜，他哈哈大笑說：「未有嘅！嗰日太太陪我去機場，佢承認呢排開心咗，食嘢食多咗，減緊喇！遲啲會苗條番啦！我哋唔心急嘅，好開心依家二人世界，如果有BB會第一時間話畀大家知。」身在北京宣傳新碟的他表示，稍後會去台灣為小型演唱會排練，而太太會擔任演唱會的視覺監督。