精通多種樂器的女子組合Robynn & Kendy近年迷上外形可愛的夏威夷小結他Ukulele，兩位成員去到邊彈到邊，常為朋友帶來歡樂，並成功感染身邊人愛上Ukulele，二人更開班授徒教同事彈Ukulele冧女，認真巴閉！

視Ukulele為親人的Robynn（左）與Kendy，各有三支珍藏。

好動的Robynn（左）及Kendy常隨身攜帶Ukulele，去到邊彈到邊。

一「彈」即合的Robynn與Kendy，常相約切磋。

不少香港音樂愛好者都愛學番幾種樂器如結他及鋼琴等傍身，希望有助日後實現音樂夢。由網上唱到入樂壇的組合Robynn & Kendy除唱功了得外，同時精通多種樂器，結他及鋼琴對她們來說毫無難度可言！原來二人亦是夏威夷小結他Ukulele的發燒友，Robynn說︰「其實都係大家識咗之後，先半認真咁玩Ukulele。」而Kendy表示是Robynn介紹她玩Ukulele，笑稱這是二人的「定情信物」！

Robynn & Kendy一玩即愛上，每人同樣買了三支Ukulele，Robynn說︰「Ukulele最貴可以去到5位數字，最平其實幾百蚊都有，因為用嘅木料同手工唔同，所以有啲只可遠觀，有啲則用嚟近玩。」由於Ukulele細小夠方便，故二人去到邊都會Ukulele跟身，並曾於中秋節在山頂邊彈邊唱及把片段放上YouTube，閒時又會帶去海灘Relax一番，Kendy說︰「我好鍾意呢類型樂器，Ukulele同結他差唔多，唔難上手，彈出嚟聲音好清脆，令人好開心！」Robynn則說︰「之前都有用Ukulele喺一個好舒服嘅海灘拍片，當時好開心，因為呢種係一個好啱郊外玩嘅樂器，但帶得去海灘通常唔係太貴嗰支，有支特別係喺台上表演，因為聲靚，一支係可以彈但唔係特別貴。」

鎅女必殺技

自二人喪玩Ukulele後，身邊的朋友也愛上這股Ukulele熱潮，Robynn & Kendy更大爆有同事想拜她倆為師冧女仔，相當搞笑，Kendy說︰「記得有個同事想識女仔，有日同我哋講要我哋做佢師傅，叫我哋教佢彈，想冧吓女仔。最後佢都成功彈到半首歌，仲識到個女仔添！」問到若有異性特地向她倆彈Ukulele會否冧爆？Kendy說：「都會，如果我教佢彈，佢彈番畀我聽，會好得意，一個男仔揸住一個小結他真係幾有趣！」Robynn卻說：「我覺得男仔唔可以搵自己追嘅女仔教佢彈，要有驚喜先得！」

除了同事受二人影響學Ukulele外，Robynn透露去年有粉絲特別為她們彈奏而相當感動︰「上年我哋開完騷後，有5至6個Fans拎住Ukulele彈我哋嘅歌，真係好特別，見到Fans受我哋影響去學呢種樂器真係好開心！」　

「千重奏」挑機

Ukulele於香港雖不算太普及，Robynn與Kendy卻希望帶動更多人玩這種樂器，並想打破最多人一齊彈奏的世界紀錄，Kendy說︰「上年日本就有超過2,100人一齊彈奏樂器，我哋想挑戰一個紀錄，同幾千人一齊彈Ukulele，覺得會好壯觀同開心！」Robynn亦希望在充滿壓力的香港散布正能量：「今年唔知做唔做到，一個世界紀錄唔只係關於做嗰件事嘅人，仲關於嗰個地方，覺得香港人生活忙碌，好多嘢煩，所以如果一個咁開心嘅樂器可以帶動多啲人去做，會覺得好滿足同自豪！」

夏威夷特產

Ukulele是夏威夷小結他，於夏威夷當地相當受歡迎，木製的Ukulele比一般結他細兩倍，驟眼看相當「的骰」，而且彈奏比結他簡單，故容易上手。Ukulele的價錢範圍很廣，最平數百元已有交易，若音色及木料較好的，則要花上逾萬元。

後記：異口童聲　

對Robynn & Kendy來說，Ukulele已屬「親人」，她們透露會用至愛的Ukulele陪住宣傳新歌《LaLaLa》，Robynn說︰「首歌講緊好多煩躁事情，想變番小朋友聽唔到煩嘢，Ukulele就好似小朋友，係好有童真嘅樂器。」二人更請來廿四味成員Ghost Style於歌曲中Rap了一段，她們笑言要以Ukulele跟對方來個Crossover，並將於下月底的音樂騷以Ukulele帶動氣氛。