林峯傳「包起」鄧智偉

無綫行政主席梁乃鵬早前揚言要培育TVB大家庭文化，言猶在耳，無綫音樂總監鄧智偉前晚突然與四位得力助手辭職，更即日生效走人，他昨日更在微博感性留言。事件傳與派系鬥爭有關，雖然余詠珊陣營此消彼長下變得強大，但無綫節目主題曲多年來都由鄧智偉主理，如今「集體請辭」似有一鑊蹺起無綫之意。

轉另一種方式合作

鄧智偉昨日承認請辭，並謂要離開工作十二年的崗位萬分不捨：「我鬥爭咗大半年，無綫有挽留，但我都係決定離職。（傳你辭職同何哲圖入主星夢有關？）既然有咁適合嘅人選，我都可以放心離開，我想出去外面闖，我好多謝咁多年來樂小姐對我嘅提拔，我都知佢好錫我，但佢都想我有好發展。（你四個下屬跟埋你一齊遞信？）我何德何能？我係自己辭職，但佢哋都話要辭，我勸緊佢哋，但佢哋都話想出去闖。」對於有傳好友林峯將會包起他搞創作，鄧智偉笑說：「唔會，好朋友邊有話邊個包邊個！（合組公司？）冇傾實，但我想獨立，想見識吓世界！已經落實咗啲電影配樂工作，唔會諗跳槽其他公司，雖然離開咗TVB，或者會轉另一種方式再合作呢！」

對於鄧智偉離職，傳與何哲圖入主星夢娛樂有關，其太太余詠珊說：「假設嘅嘢，唔想講！（何哲圖入主，對鄧有影響？）唔覺得，或者佢想有多啲空間發展。（何哲圖入主令佢冇空間？）唔會，呢啲你問番佢，總之唔係不歡而散，呢個圈好多時都出出入入，何哲圖管唱片經營，又唔係負責作曲！」

而樂易玲對於派系鬥爭之說則說：「傻啦！唔好咁傳，李生（無綫集團總經理李寶安）都好關心呢啲傳聞，我哋都係管理層，好應該同一信念，做好工作，其實呢啲傳言都唔係依家先有！（傳鄧智偉因為何哲圖而唔做？）何哲圖入嚟，有人睇住，鄧智偉可以放心辭職。」她又盛讚鄧智偉有才華，並指現時只收到一封辭職信，而鄧智偉則力勸下屬再三考慮辭職一事。

何哲圖祝福好發展

與鄧智偉合作無間的林峯昨晚出席活動時說：「喺音樂上我會繼續搵鄧智偉合作。（公司要你換班底咁點？）我之前都有同好多外面嘅音樂人合作。（傳佢走係因為何哲圖？）唔關事，我冇聽佢提過。（你同佢合組公司？）唔係咁簡單，出面已經有好多唱片公司。」

此外，將入主星夢娛樂的何哲圖回應事件時說：「我未正式返工，詳情點我唔清楚，我只係聽聞鄧智偉走，咁佢有好發展都祝佢順利。」何哲圖表示無綫的音樂節目方向正在重組、計劃，星夢娛樂下月中會正式公布，相信鄧智偉的離開不會造成影響。