成龍特訓祖名免蹈覆轍
成龍被《好報》踢爆28年前拍電影發生意外從50呎高空墮下，導致右耳聽力受損，現僅餘兩成聽力。其子房祖名昨日接受電話訪問時不諱言非常擔心父親的聽力會惡化，故經常提醒他睇醫生，其後還自爆成龍擔心他拍動作戲時受傷，特意找來「成家班」於拍動作戲前督促特訓。
祖名自爆父親成龍對他拍動作戲非常緊張，更找來「成家班」為他特訓。
薛凱琪力撐成龍心地好，更指不能憑一句說話評論一個人。
祖名拍攝電影《寶島雙雄》時，甚多危險動作場面。
今期《好報》大爆成龍右耳幾近失聰，只剩兩成聽力。
現年59歲的成龍於大銀幕打足40年，毫不錫身的他經常受傷，「戰績」纍纍，昨日《好報》披露他於1985年遠赴南斯拉夫拍攝電影《龍兄虎弟》時，自高空墮下受傷致聽力受損，現僅餘兩成聽力。《好報》指當年成龍拍攝從城堡跳到10呎對開大樹的鏡頭，雖已成功3 Take，但他仍不滿意，惟再Roll機時，因跣手未能抓緊大樹而由50呎高空直跌落地，頭着地的他被尖石插入腦髓，導致中耳骨破裂耳出血，同時右耳腔內積聚了血塊。
勸睇醫生免惡化
不過成龍因年紀愈大，加上經年累月拍攝動作片及坐飛機氣壓影響下，現只剩餘兩成聽力，近乎失聰。成龍接受《好報》訪問時雖未有正面回應右耳聽力只得兩成，但承認於特殊情況下聽得很困難，他說︰「都仲聽到，其實唔係咩大件事。」
身在內地的房祖名昨日接受電話訪問，坦言知道父親耳仔有事，亦非常擔心其聽力變得更差︰「我知道爸爸耳仔有事，唔清楚聽力係咪得番兩成，但一路都有提佢要睇醫生，唔想佢嘅情況惡化！」
祖名又透露因父親是過來人，深明拍動作場面受傷可大可小，故對他拍動作戲甚為緊張，愛子心切的成龍更找來「成家班」為他特訓，祖名說︰「阿爸都有叫我小心，每次我拍動作戲佢都好緊張，叫我練熟啲動作先，之後又叫『成家班』同我練，減低受傷風險。」去年他為電影《寶島雙雄》拍攝一場從8層樓高跳下的動作場面時，成龍即安排「成家班」在現場傍實，以免兒子受傷。
薛凱琪撐「係善意」
至於祖名緋聞女友薛凱琪早前亦有耳患，前晚她出席活動時透露已好轉︰「呢半年不停睇醫生，已經好好多。」提到成龍早前受訪時發表的言論被曲解，她極力維護說︰「我識嘅成龍係成日做善事嘅人，心地好好，相信背後係善意。評論一個人唔係憑一句說話，好似愛情唔係送一紮花就代表愛你，要睇長期行為，佢長期行為係鍾意做善事。」問到祖名有否跟她提過父親的言論常惹是非？她說︰「佢話同爸爸一樣係大細路。」
