性感女星梁敏儀（Winnie）早前在銀幕中大膽肉搏，她坦言男友對此有微言，故近日決定「封胸」學戲，轉型做「演技派」。疑患上抑鬱症大半年的她原來曾萌生輕生念頭，又為拍親熱戲而Down到爆，她說：「我仲要嫁人，性感始終有日會完。」

擁有驕人身材的Winnie認為性感不是永恒，希望轉攻演技長做長有！

Winnie與沈震軒在《古》片中有親熱戲，成為一時熱話。

Winnie曾因拍戲疑患抑鬱，進修後才走出低潮。

梁敏儀（Winnie）憑34C驕人身材闖蕩影視圈多年，去年拍電影《古惑仔：江湖秩序》時，更與沈震軒大膽露點肉搏，成為全城熱話，不過Winnie下不為例，決定收起性感「封胸」，並報讀香港話劇團的課程自我增值，轉型做「演技派」。Winnie坦言男友介意她拍性感戲：「『封』o架啦，我仲要嫁人！性感始終有日會完，不如去學演戲！因為我冇讀過藝員訓練班，一路係誤打誤撞同有人畀機會。對我嚟講要Keep身形好容易，但做演員最緊要係裏面有嘢，朋友都問我想做明星定演員，我係想做演員，希望多年後都仲繼續演戲，好似羅蘭姐浸咗好多年到依家都有戲做，或者好似蘇玉華同江美儀咁真係識做戲，我想朝住呢個方向走！」問到會否怕觀眾不接受？她說：「冇諗喎，始終需要時間，可能人哋會唔睇，但我冇可能到4、50歲都仲着比堅尼，就算我Keep到人哋都厭啦！」又稱渴望拍電視劇，希望加入王維基的香港電視（HKTV）。

Winnie又坦言拍親熱戲曾令情緒一度跌落谷底，她憶述在《金瓶梅II愛的奴隸》中拍一場男演員左擁右抱的咀嘴戲，令她極難過到想喊：「雖然裸露程度唔及《古》片，但當時我好多嘢未Ready，未清楚接得啱唔啱，去到拍攝現場，劇本同場景係兩回事，記得嗰場個男仔錫完我又錫第二個，我覺得好接受唔到同好唔開心，惟有眼濕濕忍喊。」

靠進修自我療傷

Winnie又懷疑曾患上抑鬱症，更有自尋短見的念頭，大半年終日借酒消愁：「有段時間好唔開心，唔知為乜成日喊，覺得做嘢唔如意，感情又唔如意，我成日唔瞓覺喺屋企飲酒飲到冧，突然好迷失，仲同朋友講『不如死咗佢』。」愛狗的她表示沒有看醫生，反而去學寵物美容找到寄託，逐漸回復正常生活。