自從智能電話面世，自拍成為聚會時的指定動作，素有自拍經驗的鄭融更獨創一套「多角度變法術」攝影技巧，無論要拉長腿還是影大眼都冇難度！

「埃及妖后」鄭融（右起）率領Bingo、路芙及Monnie組成「自拍軍團」玩餐飽！

當大家在化妝室投入裝身之際，鄭融（前排左一）已經Stand By！

路芙（右）慘被鄭融裝假狗，不過睇落又似乎幾襯。

歌手鄭融跟DJ董敏莉（Monnie）、路芙及Bingo早前相約到自拍照相館玩自拍，調皮的鄭融一入化妝室即「撻着」，勁High地摷衣櫃，又曳曳地拎兩個「啦啦球」塞入路芙心口「裝假狗」，在旁的Bingo一於「冇你咁好氣」，跟Monnie齊齊專心扮靚靚。

低炒腳長高炒索

未幾，「埃及妖后」鄭融、「法老王」Monnie、「聰明笨伯」路芙及「三眼仔」Bingo終於誕生，四人急不及待開始自拍，初時大家都顯得有點怕醜，玩得唔夠放，幸好有「歡樂小姐」鄭融整古做怪起飛腳，加速暖場，大家隨即「放下身段」，歪嘴、Chok眼等畸形甫士樣樣做齊！

提到時下興玩自拍，鄭融即大方分享心得：「如果想影到對腳長啲，可以低炒。如果想有迷人效果，高炒時額頭可以微微戚高，但又唔可以太過，否則會反白眼o架。」在旁的Monnie驚嘆「執相App」有助撥亂反正，即使攝影技術麻麻，都可以「救一救機」。不過，Bingo對此卻很大反應的說：「因為咁樣，所以有時候會貨不對辦。」

為個唱留倩影

喜愛自拍的鄭融希望趁後生可多留倩影，亦希望親力親為，為宣傳個唱出一分力：「即將舉行入行首個售票個唱，我好希望影多啲動態相，畀到一個永遠18歲嘅青春活力感覺畀大家！」