成龍近日的「世界大同互愛精神」言論，被外界誤解為「幸災樂禍」。本報致電楊受成，對於好友因表達問題而遭誤會，他強調成龍的說話出於好意，而「娛樂判官」黃秋生亦認為他被誤解。

成龍早前接受外國傳媒訪問時，因表達問題而遭誤會。

作為成龍好友的楊受成，希望各界不要冤枉好人。

黃秋生亦覺得成龍的說話經常被人誤解。

成龍日前在美國對外國記者談及他喜歡看到各界發揮守望相助的精神時，由於言語上有所誤解，他指「有時我會想看到有國家發生災難，像大海嘯、大地震，因為可以看到全世界立刻湧到這個國家幫忙，我非常高興。」即被指是幸災樂禍。

「感受到佢嘅熱心」

本報昨日致電成龍好友楊受成，他替成龍這番言論被外界誤會感不值：「成龍講嘢係唔叻，但佢本意好善良，呢次只係佢講得唔好，佢意思係當世界各地有災難，世人都會無分國籍、膚色，熱心幫忙，佢樂於見到呢種災難面前，世人樂意伸出援手參與救援，發揮人類團結、互相幫助精神嘅情況，而唔係外界誤會嘅，鍾意見到海嘯同地震，佢當然唔開心見到海嘯同地震！」他又說：「我識咗成龍咁多年，我感受到佢嘅熱心，佢係個樂於助人嘅好人，我覺得佢呢番話出於好意，我贊成黃秋生所講，成龍本身意思係覺得大家冇事冇幹，就各家自掃門前雪，有事先會團結。佢係希望平時冇事冇幹都應該團結！」

至於黃秋生昨指成龍講話常被人誤解：「成龍讀書唔多，但諗嘢幾有哲理，不過哲學思維解釋得唔清楚，通常會被世界誤解，我只係睇埋佢前文後理，再去理解佢意思，佢或者需要一個文膽幫佢整理講話，邊個大人物講嘢冇人事先執過內容？（你幫佢做文膽？）我邊得，佢個仔啦！讀咁多書！」