任達華、邵美琪、李璨琛、陳靜儀（Mia）及導演羅守耀等日前為電影《衝鋒戰警》受訪，任達華笑言導演收買人命：「我要不停跳樓，成套戲跳咗6次，同埋為咗套戲，我做咗人生唔應該做嘅嘢，就係我親身上陣，喺十樓一個只有一米闊嘅地方，為咗捉賊跑咗50米。」拍慣危險動作的他坦言有家室後心理壓力甚大：「我後生仔嗰陣，吊咗喺商業大廈35樓同其他演員打都係咁，但依家我諗起屋企，同埋得我有威哋，前面嗰個冇，心理壓力好大。」他表示拍畢此片後不會再拍危險動作戲：「不過我覺得呢個就係港產片受世界歡迎嘅原因，因為演員親身去搏，我覺得我哋應該將精神延續。」

李璨琛（左一）及華哥（右二）有家室都為新片搏命，令羅守耀及邵美琪大為欣賞。

華哥親身講述多個拍攝的危險位，聽見都驚。

Mia（右起）與「蜘蛛女」鄭麗莎、邵美琪及李曼筠合作拍《衝》片。

而李璨琛亦透露在此片中會有由3層樓高跳落街的戲份，導演笑他「睇咗好耐先敢做」，結了婚的他亦笑言有家庭負擔。邵美琪則表示以前拍古裝片，試過沒威哋亦要從一樓跳下來：「驚到腳都軟埋。」另外，飾演醉酒辣妹的Mia表示片中會被流氓非禮，最後由華哥勇救，華哥笑說：「拍呢場施暴戲嗰陣導演猛捉住我，叫我唔好過去住。」羅守耀笑說：「我睇得肉緊啫，本來你唔出現有好多嘢睇，一出現就即刻冇嘢睇。」