娛樂圈是巨型辦公室，同樣充滿辦公室政治，20歲的吳千語曾經擔心在娛樂圈交不到真心朋友，覺得會被身邊人當妹妹仔，會因年紀差距而有代溝。其實，莫說是娛樂圈，如此年輕便投身社會，絕對不容易。

千語雖然公開戀情，但工作時唔想講私事。

千語跟林峯因合作《男人如衣服》撻着。

千語的衣着之道是「簡單就是美」。

千語與吳尊合作拍電影後成為好友。

千語最想着出獨特風格，故出門前一晚就已襯好衫。

吳千語

年僅20歲的吳千語（Karena）入行至今只有三年，卻因擁有「林峯女友」的稱號而人氣急升，不少品牌也爭相邀請她擔任代言人及活動嘉賓。二人承認戀情前，多次被拍得出雙入對，其後感情浮面，林峯還公開發表「七愛」宣言，他倆又糖黐豆一起遊埠，感情一日千里，可謂Sweet到爆。千語愛情與事業兩得意，不少港女都夢寐以求。不過，她認為公私要分明，工作時不應談及感情：「相信好多藝人都一樣，工作同私事唔想一齊講。」既然如此，倒不如玩地下情，為何要把戀情公開？她說：「出面太多關於我哋之間嘅不實新聞，點都要個解釋，所以決定公開。如果依家繼續談論我倆私事，咁就唔係我哋一開始希望嘅嘢。」

讚吳尊玩得

入行兩年多，因與林峯合作拍電影《男人如衣服》撻着，但在戲中二人的對手戲不多，沒有假戲真做。她從來沒有想過自己會遇上他，緣分來到真係冇得擋！千語說：「就算識邊個、同邊個做嘢都唔係預計之內，緣分更加講唔埋，呢樣嘢冇乜限制。任何行業都可能識到一個同自己好唔同，又或者同自己性格好相似嘅人。」

除了愛情，友情對千語來說也是難得的恩賜。當年入行只有17歲的她認為，莫說複雜的娛樂圈，即使投身社會工作，要結交真心朋友也不是容易的事：「入行前覺得喺呢行識真心朋友幾難，身邊嘅人都大我好多，覺得佢哋會當我小朋友，年紀差得遠冇偈傾。」但第一個結識的朋友－台灣型男吳尊，令她改觀：「平時覺得佢係個沉默少講嘢嘅人，但識咗發現佢好鍾意講笑，係好好玩嘅朋友。」她認為娛樂圈令人年輕化，故沒有代溝：「24歲諗嘢似24歲，30歲諗嘢都似24歲。大家都鍾意新事物、鍾意In嘅嘢，話題好相似。」

簡單就是美

女生共同話題當然少不了扮靚，「簡單就是美」一直是千語的衣着之道，但她同時又非常欣賞色彩繽紛的韓風時裝，出席活動，繽紛浮誇就能更加引人注目！平日愛穿白色、黑色、牛仔色服裝的她，透露每月至少花五位數Shopping置新裝：「一個月去Shopping兩次，一次買衫一次買鞋，會諗嗰期鍾意咩類型。」一般女生出門前會花很多時間挑選服裝，但千語前一晚會預備翌日服裝，起身至出門只需15分鐘，仲快手過男生。問到會否穿男友指定的服裝？她說：「我着衫唔會理身邊嘅人，唔會問朋友意見。亦唔會買衫畀男友，着衫好個人，每人骨架厚薄唔同，要試咗先知好唔好睇。」

型格女生鍾情韓服

20歲的吳千語，與時下年輕又愛打扮的少女沒有分別，想穿得時尚型格表達自己獨特Style，所以在芸芸韓國品牌中，她喜歡STYLENANDA具有個性的設計。

後記：「髮」放女人味

一般20歲女生，都愛追捧韓國人氣組合Big Bang，穿的都是潮流韓風Colourful、Hip Hop、棒球元素等服裝，但拍攝當日看到穿得平實、有一頭女人味秀髮的吳千語，真的不敢相信在我眼前的女孩只有20歲。出來做事只有三年，但說話談吐、言行舉止，都成熟大方。千語係食呢行飯！