甄子丹、鄭中基與鮑起靜等前晚出席電影《特殊身份》首映，鄭中基承認曾聽聞參演的另一新片因資金問題「爛尾」，最後要找替身完成戲份，他自言已收足片酬，不擔心變「爛片」而影響形象：「好期待睇番個A貨似唔似。」

《特殊身份》首日開畫即奪票房冠軍，一班演員當然飲得杯落！

鄭中基拖實太太余思敏入場，分享女兒搵學校經驗，幸好面試時冇扭計。

甄子丹慘遭網絡打手抹黑，老婆汪詩詩睇嚟要諗定方法呵番！

鮑起靜公開拖實鄭中基，當然唔怕阿嫂呷醋！

汪圓圓（右）與蔡加讚及「未來老爺奶奶」蔡志明夫婦一家撐姐夫甄子丹場。

電影《特殊身份》前晚舉行首映，「宇宙最強」甄子丹、鄭中基與鮑起靜等均攜眷恩愛出席，子丹「姨仔」汪圓圓與未婚夫蔡加讚更拖手撐場。早前有傳另一電影《大話天仙》因資金問題而停拍，演員餘下的戲份要靠替身完成，有份參演的鄭中基亦表示有聽聞過：「我初時以為係講笑，後尾先知係堅嘅，仲話會12月上畫，都幾神奇！（到時會宣傳？）睇導演頭，話晒自己都有份做。（嗰陣有冇收足錢？）拍幾多收幾多。（如果拍出嚟係爛片嘅話怕唔怕受影響？）都唔會嘅，好期待睇番個A貨似唔似。」

「向無辜嘅人道歉」

至於子丹日前在廣州出席首映禮時表示不再與趙文卓合作，還認為對方欠了受傷害的人一個道歉，子丹覺得現已拍攝完畢，是時候給大家一個交代：「我之前唔講唔係因為想避，只係我成年都喺度拍戲，唔得閒鬧交。」早前傳出有網絡打手抹黑子丹及《特》片，子丹表示不擔心：「觀眾好聰明，我踏實拍好電影係最好！」又表示不應該搞中港矛盾：「有好多解決方法，但唔好選擇用網絡暴力，因為呢個係精神上嘅攻擊！我覺得政府應該針對呢啲事，以我所知內地政府都有做緊呢方面嘅嘢，希望呢啲情況唔好再發生，對電影圈嚟講好肉酸。（如果趙文卓道歉會接受？）我唔要求佢對我道歉，佢應該對太多無辜受牽連嘅人道歉。」

此外，曾為香港電視拍劇的鮑起靜對未獲發牌一事感失望，雖然未能出席今日的遊行活動，但會着黑衫以示支持。對於公司裁減320名員工，她說：「有個副導打畀我話佢哋唔等公司炒，全部都自動辭職，係為咗減輕公司負擔，好難得、好可愛。」另外，《特》片首日開畫即奪華語電影票房冠軍。