名模熊黛林（Lynn）於活動上與兩男大跳辣身舞，近日心廣體胖的她自爆有異性送上有心思的生日禮物，Lynn不諱言希望早日有新戀情，更隔空要求對方開口示愛。

Lynn笑言不敢問跳舞拍檔自己是否很重。

有舞蹈底子的Lynn，跳辣身舞十分養眼。

熊黛林前晚出席I.T旗下品牌Venilla suit by Lynn的鞋履活動，身穿性感舞衣的她與兩名男舞蹈員大跳辣身舞，期間被舞者攬腰時誤觸胸部。

Lynn表示為表演訓練了數月，更私下租用排舞室練舞：「十幾年前學過民族舞，但好耐冇跳，今次表演好多高難度動作，我要做一個十字架咁，由兩個舞蹈員抬起，又抱又揈。近期肥咗，想問佢哋我係咪好重，但唔敢。」雖然跳舞時不乏親密動作，但她不感尷尬，並大讚：「佢哋好專業，仲幾靚仔。（有冇過電？）有少少Feel。」她不諱言鍾情「舞林中人」，認為識跳舞的男生有氣質、自信及身形好，即時令人聯想到其舊愛「舞台王者」郭富城。

心廣體胖重六磅

日前生日的Lynn還透露因心情好而密密食，重了5、6磅：「之前去巴黎食咗好多嘢，又返家鄉蘇州，有十幾人同我過生日，好開心。（有冇異性趁生日向你獻殷勤？）冇花，但有禮物，有啲禮物都好有心思。（想追你？）唔知呢？我要人講出口嘅，以前有試過，我當場呆咗喺度。（生日願望搵男友？）呢啲係咪生日都想。」