梅艷芳（阿梅）的遺物日前公開拍賣，曾志偉及阿梅的歌迷聯手拍下其大部分獎項，志偉昨晚出席飲宴時表示希望可集齊阿梅的遺物，並放在陳列室作展覽，又大爆張敬軒暗中投下多件遺物，值得表揚。

志偉認為獎項對藝人來說十分重要，故要好好保存。

張敬軒獲志偉大讚暗中投下阿梅多件遺物。

曾志偉的表哥、前商務及經濟發展局局長馬時亨昨晚嫁女，志偉於晚上7時許到賀。梅艷芳於香港仔壽山村道故居內逾千件遺物日前公開拍賣，志偉出手競投成功投得阿梅大部分獎項，他說：「獎項好重要，係藝人嘅尊嚴，必須要保存。我當時身在越南，知道有拍賣後即時聯絡阿梅嘅Fans，佢哋好有心，但如果個個都投，就怕啲嘢四散，所以我話唔使，我攞晒先，遲啲再整陳列室，放喺入面展覽。」

學友表關心

至於競投的費用由誰負責？志偉未有正面回答，只表示不少朋友也關心此事：「我同好多朋友通過電話，我話我搞掂先，好似譚耀文、蘇永康都有提出使唔使大家夾錢，其實錢解決到嘅問題係小事，之後再討論，學友都好關心呢件事。」而志偉又點名表揚張敬軒：「佢暗中投咗好多嘢，都係佢自己扲荷包，連心經都係佢投，仲有好多遺物，佢話唔忍心啲嘢流失，仲話唔介意攞出嚟。」

供後輩緬懷

對於有指阿梅的新秀獎項不翼而飛，志偉反問：「點解唔見？（唔喺故居入面？）唔喺屋企啫！可能佢收埋咗，遲啲會拎出嚟。（會唔會幫手搵？）有啲嘢唔見冇所謂，最重要唔好流失，喺度就一定要攞番，希望搵到個地方放埋一齊留畀後輩睇。（梅媽話係佢出聲，你哋先做嘢？）我係為梅姐做嘢。」而梅姐的哥哥梅啟明昨日在電話中揚言一定追討，並表示獎座一直都收藏在梅姐屋企。