無綫咪神代有人才出，許亦妮（Whitney）憑35D逼爆身材成為新一代咪神，亦想不到在「無心插柳」下踩入大銀幕，本身只屬客串的她更有幸進身女主角之一。雖然Whitney初入行選美時，接二連三被起底，似乎與負面新聞畫上等號，當選季軍至今兩年，Whitney決定用行動證明她所擁有的，不只有負面聲音，而是有可以說服大眾的實力！

許亦妮

許亦妮在Amazing Summer宣傳片中的性感三點式，令全港男士一見難忘！

首次拍戲已擔正的許亦妮，在《喜3》中與陳柏宇有不少親密戲。

雖然參選時是非多多，但許亦妮仍勇奪港姐季軍。

天氣不似預期，Whitney沒想到早前憑劇集《老表，你好嘢！》中巴辣女「Monica D.」一角彈起，而且本來暫未有計劃進軍影壇的她，因在無綫Amazing Summer宣傳片中非常搶鏡，「無心插柳」下踩入電影圈，更在新片《喜愛夜蒲3》中，由客串搖身一變成為女主角之一，她說：「我覺得任何嘢都好講天時地利人和，初頭錢國偉導演覺得我喺Amazing Summer 宣傳片入面好突出，加上佢想搵啲唔會框死自己，又敢試敢玩嘅人。但個期夾唔到，本身只客串一場，點知之後個期又OK，就加戲份畀我。」

繼續做花瓶？唔會囉！

首次拍電影就擔正，對自己要求甚高的Whitney坦言備受壓力：「會擔心自己做得唔好，好想得到觀眾認同，唔想選完港姐淨係做花瓶，但咁大個機會畀我唔應該驚，反而想做得更好！」參選港姐時已習慣密集式排練的Whitney表示，幸運地由無綫出身，所有事都較快上手：「TVB嘅藝人已經Train到好多嘢都唔驚，例如慈善節目要表演，但要拍劇根本冇咩時間練習，所以Train到我哋好快上手，就算拍戲嗰陣有飛稿或者無啦啦多咗對白，都完全唔會驚！」而且即使與戲中對手有親密鏡頭，Whitney都絕對不怯場：「同自己講咩都要克服，時間唔會等人，一埋位就做緊個角色。」

初踏銀幕，原以為Whitney最需要克服的是截然不同的拍攝方式，但原來入行兩年的她，仍非常在意外界的聲音：「雖然一出道已經開始聽，都習慣咗，但仍然好Care外界對我嘅評價。呢排好多人都話我洗底，特登唔出街，匿埋扮乖，但其實我根本就係咁，某程度上係宅女，可能因為我細個就去咗外國讀書，變得好獨立，更加鍾意獨處，群體生活可以，但太多會冇咗自己，我寧願畀多啲時間大家睇我係點嘅人，而唔係樣樣都解釋咁多。」自言非常感性的她，認為對演戲百利而無一害：「情緒起伏大令我好快投入到角色，我發現好嘅演員都比較悲觀同感性。」

愛情與麵包，我都要！

不過在愛情中，往往較感性的一方會傷得愈重，坦言受過重創的Whitney，從不強求愛情：「我好信天意，唔會強求。好多人以為我做娛樂圈大把人追，但真係冇，其實我覺得係睇你放咩Signalo架啫，我做嘢就做嘢，分得好開。」對愛情充滿憧憬的她，一直很嚮往組織家庭，提到未來老公條件，Whitney說：「曾經有前輩同我講過，千祈唔好揀圈內人，呢個圈太多誘惑，會好冇安全感，收入又唔穩定。另一半最好畀我做我鍾意做嘅嘢，唔會阻止我做娛樂圈，會體諒、包容同明白事理，我唔可以冇咗工作，唔係會冇咗自己，希望有自己嘅事業！不過Timing都好緊要，錯嘅Timing遇到啱嘅人都係錯。」做任何事都深思熟慮的她，直言不會閃婚：「以前細個做嘢好衝動，但依家人大咗，加上入咗行，會憂慮好多日後嘅嘢，睇得更遠更通透，寧願做成熟嘅決定。」

後記：一人雙面

鬼妹仔性格的Whitney天生注定食呢行飯，鏡頭前電力十足，舉手投足都騷在骨子裏，不過鏡頭後的她卻非常爽朗兼「紮紮跳」，訪問期間談到她有興趣的話題，Whitney更會不顧形象開懷大笑，難怪她亦自嘲：「我係癲o架！」