黎耀祥與陳豪昨日宣傳劇集，兩大視帝「兄弟裝」上陣，玩遊戲時一個大講有味笑話，一個則玩得十分避忌。祥仔又認為陳豪的BB腳頭好，有望令爸爸「雙仔臨門」！

黎耀祥與馬賽用口鬥扯紙仔大勝，竟然得戚地大講有味笑話！

陳豪與法拉靠近玩遊戲時神情尷尬，玩完隨即彈開。

同場的陳智燊和謝雪心大擺甫士，為劇集造勢。

黎耀祥、陳豪（阿Mo）與陳法拉等昨日為劇集《法外風雲》宣傳，兩大視帝都以「兄弟白恤衫」上陣，席間二人玩遊戲時分別跟馬賽及陳法拉「鬥牙力」扯紙仔，獲得較長紙仔的一方為勝。祥仔以30cm大勝馬賽，即時得戚大講有味笑話：「估唔到我咁長呢？都有名你叫啦！」相反，阿Mo跟法拉玩時顯得相當避忌，扯完後即時彈開，未知是否怕老婆呷醋動胎氣所致，最後阿Mo以33.5cm取勝，在旁的祥仔即笑說：「原來阿Mo都唔差！」

陳豪憑感覺改名

陳豪表示期待劇集出街，又笑說：「仲有好多嘢都期待緊！（期待BB出世多啲？）我事業心都重，同祥仔合作好開心，好有火花同默契。」問到會否與老婆陳茵媺一同看此劇胎教，他表示還在學習：「有好多嘢嘅，依家都係同BB傾偈多！（使唔使撲奶粉同尿片？）OK嘅！都有好多人畀Product。」至於為BB改名，他指還未能公布：「都未改好。（搵師傅改？）BB名都係爹哋媽咪改，希望配合佢性格！（點知性格？）憑感覺同觸覺。（你改中文名，老婆改英文名？）一齊改，重要嘅決定大家一齊做。」

而祥仔笑言跟阿Mo合作很舒服：「有源源不絕嘅咖啡豆供應，遲啲可能有奶粉。（送奶粉畀佢？）唔使啦，佢大把Sponsor（贊助）！」又表示沒有爭視帝：「BB腳頭好，阿Mo應該『雙仔臨門』，個獎嘅人仔同佢手抱個仔！可能個BB會喺頒獎禮嗰日出世。（讓賽？）唔係，阿Mo係實至名歸！」