石詠莉早前因與雞煲東主發生爭執而鬧上法庭，原來她對煮雞亦甚有研究，中、西煮法均難不倒她！遺傳了「Cooking媽媽」廚藝的她誓要以住家菜箍實未來老公的胃，做個最靚兼最索的「煮」婦！

石詠莉擅於烹調美食，最恨做未來老公的幸福「煮」婦。

Sukie已屆適婚年齡，期望能早日組織家庭。

瑞士雞翼是Sukie的拿手菜，烹調時自然得心應手。

意式雞肉酥皮批Step by step
Step 1：先將雞髀肉切粒，然後加入醃料醃製，再倒入醬料中用湯匙攪勻。

Step 2：將適量的雞肉醬放在酥皮上，並將其對摺及包實。

Step 3：用叉壓實兩邊酥皮，再用刀輕力在表皮畫上交叉痕。

Step 4：將已拌勻的蛋黃醬平均塗在酥皮上，令酥皮更加香脆及呈金黃色。

Step 5：放入焗爐焗約15分鐘即大功告成。

前組合Freeze成員石詠莉（Sukie）四月初於西貢寓所樓下向食肆負責人投訴雞煲太辣，結果搞到對簿公堂。原來Sukie向來是愛雞之人，除了愛吃，亦愛下廚煮幾味，對各種烹調雞隻的方法都甚有研究，要數最拿手的，便是中式的瑞士雞翼及西式的意式雞肉酥皮批。

Sukie炮製瑞士雞翼前先自行調配獨門瑞士汁，該醬汁以紹酒、老抽、麻油、桂皮及滷汁等熬製而成。她表示要先將適量的瑞士汁煮滾，並將雞翼另外放進沸水中「過熱河」以辟除雪藏味及羶味。其後，她將雞翼夾起並倒入瑞士汁攪勻，並說：「其實最緊要係時間拿捏得好，唔係就易變味。」期間，她不時將雞翼正反翻轉，令其更加入味及上色均勻，約十分鐘後便大功告成！

怕蝕唔做老闆娘

Sukie透露下廚秘訣是「慢工出細貨」，並指曾因一時貪快而令味道變質：「要十分鐘煮一個餸係冇可能，我覺得煮嘢食要有步驟先會好食，所以千祈咪貪快！」本以為她會經常下廚冧男友，她卻自爆只會為家人炮製大餐：「我啲前男友都唔幸福，佢哋冇咩機會食到我煮嘅嘢。因為我衰格，只會煮畀家人食，太錫屋企人。」問到現時可有男朋友？她猶豫片刻後說：「冇呀！」

她揚言要以一手好餸來俘虜未來老公的心：「當然我希望可以煮畀下一任男友食，因為我以搵老公為目標。」立志做家庭「煮」婦的她又表示已屆適婚年齡，期望早日結婚：「依家我呢個年齡已經唔係搵男友，係要搵老公，要組織家庭。（做煮飯婆？）我係工作狂，要我喺屋企煮飯、摺衫、洗地係完全唔得。」問到可有想過開餐廳做老闆娘？她說：「蝕晒就唔好啦！反而我會畀媽咪開，佢知道買咩食材最新鮮，煮嘢又叻！」　

後記：慳家乖女愛打包

拍攝完畢後，Sukie即場試食雞批並大讚好味，身為廿四孝乖女的她更表示要打包回家給父母品嘗：「依家返到屋企啱啱好開飯，等我打包埋雞翼返屋企加餸先！」她除了煮得一手靚餸及孝順外，又懂得省錢，名副其實是個「入得廚房、出得廳堂」的好老婆！