名模Rosemary前晚與外籍男友前後腳出席酒吧活動，早前被拍到與其他男士親吻的她表示獲男友體諒，並踢爆男友以一口流利廣東話成功氹掂未來外母：「佢同媽咪溝通得好好！」 　

風騷的Rosemary表示男友非常體諒她，並否認男友「監場」。

低胸的Mia畀面撐場。

張敬軒（左）與孫耀威認為樂壇仍有希望。

名模Rosemary、張敬軒、孫耀威及模媽Mia等前晚出席《SHOW Club開幕派對》，擔任司儀的Rosemary以露背短裙亮相，並透露男友將會到場：「佢有份安排活動。」由於她早前被本報拍得「親吻」外籍男子，問到男友是否來「（目及）實」她？Rosemary說：「佢超明白我，知我私生活喺香港會畀人公開，但新聞令我變得更強壯！」問到男友有否向她求婚？她不置可否說：「你問佢，我好放鬆，呢個時間好開心，等大家唔好成日飛嚟飛去先啦，順其自然！」多次拍拖均遭母親棒打鴛鴦的她說：「媽咪都鍾意佢，佢識講廣東話，同媽咪溝通得好好！」

軒仔捱批當「袋錢」

而早前被前輩周啟生批評「冇火」的軒仔首度現身回應：「有則改之，無則加勉，如果有道理就當袋錢入我袋，如果唔係事實，咪當一種意見囉！（佢用癌症形容樂壇？）70、80年代的確好蓬勃，我可以講，如果佢哋生於呢個世代，相信條路冇咁順風順水！」孫耀威則認為香港樂壇未死：「死唔會死，仲有好多歌手喺度。」