一直賣關子的「豪B」性別昨日終於揭曉！懷孕後首度「復工」的陳茵媺，昨日在近10人保護下出席活動，她宣布腹中BB是囝囝，預計聖誕或新年出世，而她將留港自然分娩，老公陳豪亦會陪入產房，親自迎接新生命來臨！

腹大便便的茵媺穿上高踭鞋出席活動，而且鞋子有點鬆，睇見牙煙！

茵媺談及「豪B」即笑到見牙唔見眼，絕對是個開心大肚婆！

貪靚的茵媺不但踩高踭，還露出大大個背脊，小心吹親呀！

大肚婆破戒飲酒？不擔心老公詐型！

茵媺離開時，一架手推車經過，「護駕大軍」即緊張開路，以免大肚婆撞親！

懷孕約7個月的陳茵媺，昨日首度「復工」剪綵搵「奶粉錢」。身穿露背開衩長裙的她，貪靚地穿上5吋船踭高踭鞋，睇見牙煙！剪綵時，她被花炮嚇一嚇，其後獲贈兩隻共值近4萬元的名錶。

陳豪一直對BB性別賣關子，原來是留待太太茵媺揭盅！記者昨日追問BB性別時，茵媺笑說：「你哋估吓！係仔仔嚟，佢會係個Christmas或者New Year Baby。」她計劃留港分娩，但不會擇日剖腹，希望感受「女人最痛」的寶貴經驗，她說：「佢鍾意幾時出嚟就出嚟，呢個責任交番畀BB。」問到陳豪會否陪入產房剪臍帶，她說：「佢會陪我，佢成日扮醫生，我諗佢唔怕血嘅。」剪綵10分鐘便賺得6位數字的她，坦言佗B感疲倦，要看緣分及性質才決定是否再出席活動。

自爆間中「偷食」

問到陳豪得悉一索得男是否很開心，茵媺說：「仔女都冇所謂，反而我特別開心，我會有一段時間係個仔唯一一個女人，哈哈！」她指BB健康活躍，而她的口味沒有多大改變，只是不敢食刺身或飲咖啡，連朱古力也少吃，只是間中為氹自己才「偷食」。談及日前的四車連環相撞意外，她說：「係人哋撞我，只係小意外，唔嚴重，不過都做咗檢查，冇事。（陳豪唔准你再揸車？）大家都有勸我，但我16歲已經揸車，就好似我另一對腳咁，盡量揸少啲啦！」活動結束後，她在4名保安、經理人、工作人員及父親等近10人包圍下登車離開，沿途不時與市民打招呼，十足女王出巡！