無綫小花蔣家旻（Angel）最近跳入大銀幕榮升「女一」，除了感人喊戲備受讚賞外，當中兩幕大膽的情慾戲及露背演出更令男Fans看得眼定定！不過，Angel揚言要暫時「戒色」，以免被誤會改行性感路線，宅男Fans可真要珍惜這個可一不可再的機會！

初次跳入大銀幕即做女主角的蔣家旻坦言大有壓力。

Angel曾挑戰底線，穿上三點式拍劇。

蔣家旻（右起）、葉念琛及馬志威不時到戲院謝票。

蔣家旻曾於《金枝慾孽貳》飾演妓女，與陳豪有不少對手戲。

「乖乖女」蔣家旻於新片中與馬志威有大膽情慾戲。

Angel怕觀眾誤會她改行性感路線，揚言要「戒色」！

現年23歲的蔣家旻在無綫多年，大多飾演乖乖女角色，最為人熟悉的是每晚開電視都能看到的「馬子妮」，她在劇中與家人相親相愛，全天候發放正能量。要數她較激的演出，亦只是在《當旺爸爸》中穿泳衣上陣，以及在古裝劇《大太監》中飾演妓女，兩次都是點到即止，但最近跳入影壇躍身女主角後，她即豁出去！

Angel在葉念琛執導作品《第一次不是你》中飾演為救母親而不惜賣身的少女阿寶，除了慘遭嫖客SM虐待，更與男主角馬志威（Edward）有兩幕大膽情慾戲及露背演出，睇到Fans嘩聲四起！她坦言重看演出亦略感尷尬：「朋友睇完都話估唔到我會拍有咁多身體接觸嘅戲，我都冇乜眼睇，但劇情係有需要咁做，扭擰咪仲尷尬？我信任對手、導演同工作人員，大家都知我大壓力，會令我哋拍得舒服嘅！」

嫌腰唔夠幼

提到不少Fans讚她身材好，Angel說：「我唔係咁敢着三點式，覺得身材唔係太好，腰唔夠幼，又唔係模咁S形。睇番拍嗰陣身形都幾腫，依家瘦咗好多，但我個角色係16歲，當係Baby Fat。（驚觀眾只留意你身材？）冇辦法控制人哋點睇，其實套戲唔係賣弄性感，有好多感動位，觀眾唔會只睇有幾性感。但今次都有少少超過我底線，之後暫時都唔會啦！（過冷河？）係呀！怕大家以為我突然行性感，而且簽咗TVB經理人合約，都係聽公司話。」

怕累全家拖垮票房

提到首次接拍電影即做女主角，她坦言壓力不小，曾擔心會「累全家」影響票房，幸而該片口碑甚佳！電影上映期間，導演、Edward和她幾乎每晚都到戲院謝票，直接與觀眾見面，令她感到既新鮮又驚喜，她說：「有好多觀眾都好似睇番自己經歷咁，有個男人話曾經畀兩個女人呃過，又有個女仔話有個青梅竹馬嘅男友，仲邊講邊喊！謝票可以即刻收到Feedback，同拍電影、拍劇嘅回響唔同，各有滿足感。」

不少觀眾都大讚她演技成熟，擺脫「公仔箱」小女孩的感覺，但Angel自評其處女電影演出只值60分，並謙稱：「我覺得只係啱啱合格，睇咗3次研究點樣演得好啲，仲有好多地方可以演得更細膩、更有層次。」提到她於片尾哭着跟Edward說的最後一句話：「就算我唔喺你身邊，我都會好掛住、好掛住你！」令不少觀眾喊爆，Angel自言那是她最滿意的一幕：「當時銅鑼灣好多人，但我哋做到眼入面只有對方。以前會諗應該點樣喊，但今次係投入到流真眼淚。」問到是否有信心提名新人獎？她表示不敢多想，但坦言希望可以跟同屬新人的Edward一同提名，但即使落空仍會繼續努力。她又透露其主演新片《溝女不離3兄弟》即將上映，希望能於電視及電影方面作雙線發展。