無綫小生林峯今年冇劇上，明知角逐台慶視帝無望，前晚沒有現身亮燈儀式，反而孖女友吳千語歎日本菜並結伴返BB香閨。

祖兒女人味大爆發，與林峯踏上紅地氈。（美聯社圖片）

千語與女友人上的士後，林峯即從另一邊車門上車。

林峯帶千語BB（箭嘴示）赴友人飯局，全程笑不攏嘴。

現年33歲的林峯去年戀上年輕十四載的藝人吳千語，拍拖不足一年已屢傳婚訊，林峯更已視千語BB為結婚對象。無綫前晚舉行台慶亮燈儀式，一直被視為親生仔的林峯卻未見蹤影，原來近年主力北上拍劇掘金的他，今年沒有自家製劇集，故冇份參與亮燈。既然角逐視帝無望，林峯索性孖千語BB搵食！

「專用的士」接送

當晚「峯語」拍拖到灣仔一間日本餐廳出席朋友飯局，席上點了多款魚生及日本清酒，邊食邊傾，兩人繼續如連體嬰般黐到實，又不時當着友人面前摸手仔，期間林峯更細心陪女友去洗手間，於門外耐心等候，見少一陣都唔得，冤氣到爆！

至晚上10時半，千語BB長期租用的的士在食店外附近等候，穿黑色情侶裝的「峯語」拖手步出餐廳，跟朋友道別後，千語率先登上的士，一名女友人緊隨其後，林峯即箭步從另一邊車門上車黐實BB坐，之後再直駛女友位於中半山的香閨。