蕊蕊最愛高達有毛有翼

講起女孩子的最愛收藏品，芭比公仔一定榜上有名，不過蕊蕊卻大唱反調，坦言機械人高達才是最愛，一講開高達，平日沉默寡言的她即變得活躍起來。眾多高達系列中，她表示最愛Gundam Wing系列，她說：「因為我覺得好靚，而呢一個系列係有羽毛。我本身好鍾意有翼嘅嘢，所以我養鸚鵡同埋我手臂上嘅紋身都係以羽毛為主。」

約金剛日本朝聖

雖然蕊蕊歌唱事業才剛剛起步，不過講到砌高達卻已經算是個老手，約有6年年資的她，家中收藏逾50隻大大小小的高達模型，她說：「唔知點解每次搬屋都會唔見咗幾隻，同埋有啲又爛咗同舊咗，所以都冇拎出嚟。無論扭蛋同自己砌，我都會儲，一見到佢哋就好有成功感。」她慨嘆打理高達非常麻煩，因機械人關節多，容易惹塵埃：「其實近睇我啲高達係有啲塵，要逐條罅去掃番啲塵出嚟，所以有未必可以清理到，咁都冇辦法。」

蕊蕊家中雖然多個高達，不過她表示不會全部「晒冷」，只是將部分「寶貝」精選展出：「我會買嗰啲透明盒去擺佢哋入去，等我又可以望住佢哋。騷唔晒嗰啲，我就會將佢哋放入膠盒度，咁樣就可以保存得好啲。」講到砌高達方面，蕊蕊坦言令她非常有成就感，雖然有時要砌足幾日幾夜，不過每當看到製成品時，即感到莫大滿足，她說：「每一隻都係我自己砌，細隻個啲一分鐘就搞掂。大隻嗰啲就要不停砌兩至三日。（難唔難？）入面有說明書，雖然係日文，但有圖睇其實都好易明，只要你跟住個圖砌就冇問題。不過有個重點，就係啲配件好細粒，要小心啲保存，萬一唔見咗，係唔會有後備，唯一方法就係要填Form寄去日本，叫日本嗰邊寄番畀你，真係幾麻煩！」

問到會否到日本高達博物館「朝聖」？蕊蕊笑說：「我都想！我知道有個一比一嘅大型高達，好想去影相！不過我冇時間兼冇人陪我去，冇乜女性朋友鍾意。（叫金剛去囉！）唔知佢有冇時間呀！」

保養秘笈「收收埋埋」

面對眾多高達收藏品，蕊蕊對保養有一副獨特見解：「我會將佢哋放晒落盒，一來費事惹塵，二來又唔使唔見咗啲配件。如果我好鍾意嘅話，我會砌一隻，買多一盒去收藏，咁樣就可以防止佢唔見啲配件。」不過，高達系列多以白色為主，問到可有良方解決變黃？她無奈地說：「我有幾隻都變咗黃，不過都冇計，惟有多啲清潔吓佢哋，加埋我本身住嗰區都好潮濕，所以都特登租個迷你倉去安置佢哋。」

後記：拎到手軟！

訪問當日，蕊蕊一個人拿着大批機械人到訪問場地，拍攝前，她將機械人再裝嵌，只見她小心翼翼，每一個細節都力求完美。還有，大家別以為機械人「身輕如燕」，原來拿起上來時儼如幾斤重一樣，所以當蕊蕊完成整個訪問後，即展露真性情大呼一句：「真係拎到我手都軟埋呀！」