離巢法拉放逐邊皮
約滿無綫的陳法拉昨日依然為台慶劇造勢，雖然大合照時企前排，但卻被冷落兼「放逐」至邊皮的不起眼位置，她直言無綫未有斟她回巢，最後更提早閃人！至於視帝大熱黎耀祥與陳豪互笠高帽，祥仔更出口術大讚無綫︰「唔會閉門造車！」
法拉已離巢仍為新劇《法外風雲》造勢，表現投入。
視后大熱楊怡穿短裙晒腿。
與陳展鵬一同谷劇的蕭正楠（左），因緊張而狀態欠佳。
陳智燊發言時，在旁的王浩信（前排中）拉着他搞搞震。
今屆視帝大熱陳豪（左）與祥仔互笠高帽。
無綫昨晚舉行《時刻裝備TVB創造46年傳奇》亮燈儀式，為下月的台慶造勢，多位主演台慶劇的演員包括陳豪、黎耀祥及鍾嘉欣等均有出席，行政主席梁乃鵬則在港姐三甲陳凱琳、蔡思貝及劉佩玥陪同下主持亮燈儀式，而陳法拉雖已約滿離巢，但仍以律師Look為主演的《法外風雲》撐場。
大合照時，兩套台慶劇《法外風雲》及《On Call 36小時II》的演員分別站在梁乃鵬及司儀陳百祥（阿叻）與鄭裕玲兩旁，原本法拉應與拍檔黎耀祥及陳豪排排企，但卻被安排至邊皮的不起眼位置，離奇站在《巨輪》的鍾嘉欣及陳展鵬旁邊！事後法拉受訪時被問及靠邊站一事，她說：「唔知喎！收通告返嚟宣傳新劇。」問到會否因不受重視而不開心？以及無綫是否很現實？她豁達地說︰「呢啲係身外物，唔會在意呢啲嘢。返嚟見到同事好熱鬧、好開心，我稍後會出席劇集宣傳，第一個宣傳已經落實，之後再度期。」又表示不覺得離巢後待遇不同。
冇人斟回巢
對於無綫被指以視后作條件跟藝人簽約，法拉說︰「冇咁嘅事，獎同約向來分開。」並揚言現身電視城並非為合約，又指沒有人找她傾回巢︰「只係有搵我傾劇集宣傳，冇搵我傾合約，今次係返嚟做劇集宣傳，同合約無關。」問到是否落實簽約陳慧琳經理人鍾珍，她說︰「佢暫時幫我接工作，詳情稍後公布。」節目結束前，她已提早閃人，而其大合照位置則由港組冠軍陳凱琳頂上。
至於視帝大熱祥仔與陳豪惺惺相惜握手，對於視帝被指是二人之爭，祥仔反應甚大地說︰「唔係，仲有Sam哥（吳鎮宇）同Cool魔（張智霖）！同陳豪好耐冇合作，第一次做律師角色，希望可以打開新路線，長做長有！」他又賣口乖撐無綫選視帝會聽取民意，不會閉門造車。而陳豪則向祥仔笠高帽，揚言合作充滿壓力，不過談及視帝之爭，他即口啞啞，只懂說︰「唔係咁講嘅，祥仔有王者風範，我呢就……（拎埋視帝多個喜訊？）今年好開心，承你貴言！」當問到太太陳茵媺腹中BB的性別，他則繼續賣關子。
此外，昨晚的節目由往年錄影改為直播，不少藝員食螺絲，其中吳啟華與馬國明宣傳《On》劇時多次甩嘴，連經驗豐富的阿叻亦忘記台詞，鍾嘉欣與蕭正楠同樣不在狀態。
