過檔星煥國際一年的歌手謝安琪（Kay），最近推出全新國語專輯，曾與Kay傳不和的「舊東家」環球唱片「咁啱」同時推出其廣東精選碟搶銷量，更以她的新歌歌名命名，但碟中沒有此歌，引起Kay的經理人夏森美與環球隔空開火！

日前Kay為新歌拍攝MV，豈料新碟被「舊東家」環球搶銷量。

Kay去年加盟星煥，深受老闆何哲圖（右）和經理人夏森美重視。

謝安琪去年與環球唱片疑因意見不合傳不和，Kay更提早解約，跳槽星煥國際有限公司，隨即推出派台歌《最好的時刻》，更大獲好評。近日「舊東家」環球突然推出一張名為《最好的時刻》的精選碟，疑是狙擊Kay剛上架的國語碟，最離奇的是精選碟中沒有《最》曲，有「掛羊頭賣狗肉」之嫌，更有Kay迷誤以為偶像推出全新廣東大碟而「中伏」，炮轟環球「抽水呃錢」，更激動到用英文粗口鬧爆！

勸歌迷睇清楚先買

Kay的經理人夏森美得悉此事後說：「我好同意網民！的確有抽水之嫌，入面冇呢首新歌即係有誤導！（環球狙擊Kay？）冇所謂！外人眼睛雪亮，唔擔心會搶銷量。」他又補充：「不過都要個歌手有成就，舊公司先會幫佢出精選碟嘅。」至於星煥老闆何哲圖（Herman）大方表示「唔介意」，又透露年底會幫Kay推出「正版」廣東碟，問到可擔心「Kay迷」入錯貨？Herman說：「歌迷買之前睇歌單，就唔會買錯。」

另一邊廂，環球唱片的助理總經理譚先生則反駁：「好多公司都會喺歌手過檔後出精選碟，Kay根本唔係先例，毋須大家去研究。」他又強調類似情況根本「一啲都唔出奇」，更隔空向夏森美作出反擊：「咁佢哋有冇Copyright先？啲人要含沙射影我都冇辦法o架喎！」

另外，Kay日前拍MV的喊戲時，一埋位即爆喊，她說：「見到片場有隻狗仔，令我回想起已離世嘅小狗。」此外，她多年前亦曾簽約香港avex，日前日本avex公司宣布業務重組，位於香港的avex國際控股有限公司及其香港與上海子公司將暫停業務，由新加坡分公司接手管理。而身為avex一姐的日本歌手濱崎步，昨日35歲牛一，不少歌迷在其Twitter送祝福。