近月「浸大咪神」楊焉封胸練拳，昨日在綜合格鬥比賽中險勝對手，榮升拳后，她得悉賽果時驚愕O嘴眼凸！同場出戰的王宗堯則捱打捱足三個回合，落敗後仍大方抱賀對手。

上擂台
操練多時就睇臨場一刻表現，Carol打起上嚟唔係人咁品！

施鎖功
捉到路後，Carol愈戰愈勇。

回氣

硬食重拳
Carol被對手追打頭部，最後仍以點數險勝，連她亦覺唔係真。

贏得愕然

Carol﹝左﹞

當年硬銷性感的Carol，昨日捧盃成為新一代拳后。

陳蕊蕊（右起）因傷退賽唔使打，男友金剛安樂晒。

昨日「浸大咪神」楊焉（Carol）及王宗堯（Greg）參加《Energy Fight》2013綜合格鬥比賽，各自與磅數相若的對手激戰三回合。

Carol於比賽初段略為緊張處下風，休息時扯晒蝦，其後愈戰愈勇，眼神變得兇狠，頻頻以勾拳及鎖技得手，最終以點數87比86險勝，成為拳后！當得悉勝出時，她亦愕然得眼凸O嘴不懂反應，事後說：「好似發緊夢咁，感動到想喊！會再由基本功練起，希望再出賽。（上圍縮水？）係瘦咗，但冇諗呢啲嘢。（點慶祝？）呢兩日狂食飯食芝士，食番一年嘅分量！（約男友？）冇呀！男性女性朋友都約。」

王宗堯敗戰賀壽

至於今日35歲生日的Greg，賽前表示與對手梁國堅相識約九年，笑言望對方手下留情，但對戰時二人均使出真功夫，期間Greg一直捱打兼兩次被掃低，隱形眼鏡亦打到甩，但他堅持完成三個回合，落敗後大方與對方擁抱，體育精神可嘉！

陳蕊蕊臨陣退賽

至於原定出賽的歌手陳蕊蕊，她與男友金剛到場時臨陣聲稱因後頸舊患復發而退賽：「排舞扭親舊患，前一晚登台覺得痛，同公司傾過決定退出，都覺得可惜，始終練咗幾個月！（金剛支持？）佢唔係好想我打，驚我受傷。（點呵番你？）有車我返香港。（幫你搽藥膏？）未。」