外表斯文的吳彤平日酷愛健身，由中學孱仔搖身一變「肌男」，巔峰時期更練成40吋胸，自稱「人到中年」的他近年狂操Keep Fit，成功留住「朱古力腹肌」，更不時與好友健身切磋，又「建議」麥貝夷（Karene）擴胸，但Karene卻高呼怕扁胸，只望向他請教瘦腿之道！

Karene看見吳彤赤裸騷肌，大讚Very Good之餘，又表示想找肌肉型男友。

吳彤相約好友Karene到來健身，並取笑她需要擴胸。

減Bye Bye肉
將健身板放在頭後，然後雙手慢慢舉高，並伸直Hold一秒，整個過程約5秒，動作重複做15下。

美胸修副乳
先坐在椅子上，單手拎起塊板，再慢慢舉高至80度，然後一邊吸氣一邊放下，左右兩邊做15下。

收緊大腿及臀部
將兩塊板放在地上，踏上板後雙腳站於兩側，然後慢慢踎低，再一邊呼氣一邊企直，重複做15下。

練胸、腹及三頭肌
將健身板反轉放在地上，用雙手按着板的兩側，記得下巴要在手前，然後伏地挺身做6至8下，上升時要呼氣。

練二頭肌及前膊
左右手各拎起兩塊板，再慢慢舉至膊頭水平線，一共做10到12下，記得雙肩不要縮起。

壯大六舊腹肌
要練成「朱古力肌」，便要來個「終極倒轉式捲腹」，首先於腳上穿好特製掛鈎，然後上架倒吊，雙手再執起健身板。

接着用盡全力，將整個身體彎曲向上升，記得有幾高就上幾高，當然初學者必須要在導師指導下進行！

創作歌手吳彤外表斯文、內裏Wild到暈，在加拿大讀中學時瘦蜢蜢，經常遭大隻老外欺負、撩隻揪，令他決心向阿Sir請教做「肌男」，大學時又跟同學「廢寢忘餐」地做Gym，他笑說：「嗰時最癲一個禮拜練4、5日，個胸最勁都成40吋，依家冇啦！反而興瘦，因為我又唔係好高，太大隻上鏡會臃腫啲。」

不過，自稱「人到中年」的吳彤笑言「條腰唔得」兼「冇咁實淨」，故近年開始狂操保持身形，並於每周分三Set練3、4日，大多鍛煉膊頭、背脊、胸肌及二、三頭肌，他說：「依家身形可以媲美十年前，絕對有六舊腹肌，做40下Sit Up都面不改容。（出寫真？）如果有人願意蝕錢投資，我絕對OK，早排出唱片有歌迷讚我靚，但就嫌着多咗衫，我唔介意裸露，但唔會為露而露。」

效法家輝城城

提到練成「筋肉人」的張家輝，吳彤揚言以對方做目標，並大讚郭富城身形Fit到漏：「我覺得城城好犀利，可以Keep到六舊腹肌、零脂肪，如果有機會見到要請教佢，將來我過咗四十歲都咁就無憾啦！」閒時，他又會相約圈中好友「過招」，來偷師的Karene）則被嘲需要擴胸！Karene表示最怕健胸：「有傳聞話擴胸會扁咗，因為乳房大部分係脂肪，做運動會消耗嗰度啲脂肪，所以我有啲驚。」但導師EO Tang指健胸絕對不會令雙峰扁平。

讚娜姐身材正

自言上鏡較肥的Karene，非常着重身形，平日也常跑步及跳舞，她希望向周秀娜的身形進發：「我想對腳再Firm啲，因為我細個打排球，對腳肌肉好大，除咗水腫外，仲有少少脂肪。我覺得周秀娜身形好好睇，因為佢有腹肌，線條好靚！至於上圍係先天嘅，咁就算罷啦！」

她又大讚「師父」吳彤身材「Very Good」，訪問當日見對方赤裸騷肌，Karene即流晒口水兼喪（目及），問是否鍾情大隻仔？她說：「我細個讀女校，好少接觸男仔，大個識到男仔都唔會叫人畀啲肌肉嚟睇，平時喺Instagram見到吳彤晒肌，今日好幸運終於睇到佢。（想搵個肌肉型男友？）梗係希望啦！」

獨門絕技：伊健傅穎齊撐

星級導師EO Tang任職健身教練近十年，曾指導多位名人紅星，包括鄭伊健、賈思樂、傅穎、范振鋒及吳若希等，其獨門健身絕技則是利用「RMT多功能健身板」來配合不同練習，他指加入水的板能鍛煉平衡力，令每塊肌肉都得到深層訓練。