香香慳妹置業認食發脹麵

香香與張兆輝主演的無綫新劇《神鎗狙擊》正在熱播，香香於戲中不停以小背心上陣，大晒33C逼爆身材，難怪女神地位穩如泰山！不過，她脫下戲服後即變身「乾物女」，雖然有指她參演劇集《巴不得媽媽…》後成功吸金近400萬元，但由於儲錢買樓的目標明確，她平日更厚住面皮黐車坐、黐嘢食，三餐以清簡為主，更鮮有Shopping！有幕後工作人員透露：「香香好乖好慳，出晒名連道具飯都照食，食唔晒仲會打包！」日前，香香便於微博上載一張捧着發脹牛腩麵的相，賣相非常「唔開胃」，但她依然自得其樂。

香香似乎並不介意被指為「新一代慳妹」，她受訪時說：「食道具飯餸？睇你點睇啦！如果明知嗰日拍飯戲係有好嘢食，我都會留肚。我係有打包，呢啲係父母由細教落嘅！（你食發脹麵？）嗰日拍外景，知道附近有間牛腩麵出名，咪買上外景車食囉！我係慳，儲錢買樓係其中一個目標，但暫時連首期都未有。」

張兆輝揸「波子」出巡

另外，張兆輝與太太經營的美容生意做得有聲有色，當中有星級顧客如周潤發等，最近有指家住貝沙灣的他身家近半億，堪稱圈中隱形富豪！日前，他獨自駕駛價值約200萬元的波子外出，前往中環購買自然療法產品。當發現記者在場後，他即大方打招呼，相當親切。據悉，他一直是愛車之人，而且早已有實力「升呢」，但怕高調一直心大心細，至最近才決心換車。