AK 失城：點解疏遠我
自傳出秘戀內地藝人葉熙祺後，有指郭富城不滿有人多次放料，日前拋下一句「過咗去喇」KO戀情，拍拖兩個月便分手！昨日來港出席活動的葉熙祺終爆承認單身，更愈講愈酸：「點解要話疏遠我！」
最初仍擺出「城嫂」姿態的AK，受訪期間表情多多，最終還是瘀爆收場！
飛甩AK的城城心情大靚，搭着蠟像Chok甫！
今年7月，郭富城被指在好友張智霖介紹下認識內地藝人葉熙祺（AK），並隨即秘密撻着，惟向來低調處理感情事的城城，今次拍拖卻屢被撞破，AK不只一次被拍得出入「城堡」，更多次默認已升呢新「城嫂」！懷疑有人放料的城城，日前終罕有開腔說：「過咗去喇！」正式為這段維持僅兩個月的戀情宣布死亡，將AK趕出「城堡」！昨日二人分別出席公開活動，城城隻字不提AK，而有備而來的AK初時仍死撐保持「城嫂」姿態，被再三追問後才終於「」認單身！
自爆未斷聯繫
昨日在活動上，AK起初揚言知道城城很忙，因而未有時間見面，更指對方於中秋節仍有傳短訊祝福她，直至記者表示城城自稱單身並與她劃清界線，她才死撐說：「我唔係講過住佢隔籬，有乜好疏離，我冇講過拍拖，我係單身。有雜誌話我自爆拍拖，係不實報道，公司已發聲明！」此時，她更突然由「城嫂」姿態自行「降呢」，強調一直是單身，何來劃清關係。問到是否跟城城冇朋友做，她說：「咁要聽吓佢點講先。（打電話質問佢？）唔使。（主動聯絡佢？）我好少主動打電話畀人。（對上一次係幾時？）唔記得。」
記者再追問是否因城城劃清界線而很Hurt，她說：「都冇呢回事，點解要話疏遠我，我唔明，點解係都要咁樣話。（因為你放料囉！佢係咪疏遠你？）我唔覺，大家都間中聯繫，朋友嘛！（撇甩『城嫂』個名？）我一直否認『城嫂』個名。（但你搵多咗錢？）冇承認過。（你抗拒過呢個名？）冇乜感覺。」
避談舊愛緋聞
至於城城為新片《西遊記之大鬧天宮》出席蠟像館活動時極度風騷，卻隻字不提AK，問到是否知道舊愛熊黛林在巴黎拖新歡，他說：「唔係自己嘅嘢唔講！」並即時扯開話題談電影，提到片中太太陳喬恩受情傷，他說：「係咩？我察覺唔到，佢開工嗰時好正常，我同佢成日傾心事。（咁Close？）戲入面，戲外都覺得佢好活潑、好開朗，唔覺得佢受影響！」
