美國女歌手Miley Cyrus早前於《MTV音樂錄影帶頒獎禮》大玩不文，因而被插至體無完膚。但她日前又全裸上陣為雜誌拍攝封面照，兼身穿性感球衣拍MV，受訪時更教Justin Bieber做人之道，面皮相當厚！

最近頻頻玩不文的Miley Cyrus不厭其煩，再次做出伸脷舔膊頭的招牌動作，登上新一期《滾石》（Rolling Stone）雜誌封面。相中所見，「伸脷姐」在泳池邊用雙手夾胸及露出紋身，事業線甚有睇頭！為紀念首次登上《滾石》封面，Miley竟將「Rolling Stone」字樣紋於腳板底，令她痛極爆粗！受訪時，她為早前於《MTV音樂錄影帶頒獎禮》的不文演出作辯解：「點解冇人講我後面嗰個男人？淨係不停講我喺Robin Thicke面前扭屁股，又唔會話係Robin磨我，明顯係雙重標準！」她又透露當時並不是想玩性感，但自言現階段不適宜在網上搜尋關於她的新聞，並大讚饒舌歌手Kanye West在演出時鼓勵她，令其緊張感全消。

新MV教壞細路

此外，她力撐「麻煩小天王」Justin Bieber：「佢真係好努力，但啲人冇認真睇，佢真係識打鼓、彈結他同唱歌。我唔想睇到佢做人笑柄，叫過佢出街咪亂嚟同咪除衫，但我諗男仔嘅頭腦係遲七年發育，佢思想真係似得12歲。」

另外，Miley與緋聞監製男友Mike WiLL Made It合作的新歌《#23》MV曝光，片中所見，身穿與NBA名宿米高佐敦（Michael Jordan）一樣、23號性感球衣的她在學校的廁所內煲煙兼趷籮，認真教壞細路！此外，有傳Justin Bieber早前發現放置在家中的珠寶及物件不翼而飛，指摘曾在他家中開派對的老友Lil Twist及Lil Za未有看管好財物，將兩人逐出家門。