已合作12次的古天樂及劉青雲，前晚以「兄弟裝」出席新片首映，青雲笑言二人連着衫都有默契，而穿鬆身裙的李心潔孕味甚濃，更笑言想盡快做媽媽。

以「兄弟老西」谷戲的青雲（左起）及古仔齊齊放笑彈，逗得心潔忍俊不禁。

詩詠以性感打扮到場，落台時分外小心。

即將赴巴黎的Lynn被圍訪，笑言無意找外籍男友。

變了「獨眼龍」仍捧場，張兆輝認真畀面。

劉青雲、古天樂、李心潔及唐詩詠等前晚到尖沙咀出席主演的寰宇電影《逃出生天3D》慈善首映，青雲跟古仔均穿西裝及牛仔褲，被戲言似足兄弟裝，他倆表示沒事先夾定。提到今次是第12次合作，青雲笑言感覺很膩：「緣分囉！我哋都冇得揀。（有默契？）着衫係囉！」提到被指有份投資《逃》片，古仔說：「冇咁嘅事！（有冇興趣投資電影？）冇回應！（如果係就搵青雲做主角？）一定啦！（有冇人搵你投資？）冇喎！我享受做演員，投資電影風險大，除非十拿九穩。」

而女主角李心潔穿紅色鬆身裙到場，孕味甚濃，但她否認有喜：「我都想，但順其自然。（老公有冇壓力？）佢冇，佢（同前妻）有個女，可能係我想要多啲，都想有做媽媽嘅經驗。」問到會否食補品「谷B」？她表示最近不時跑步、耍太極及練氣功，笑言可以做打女。提到同期出道的吳佩慈懷孕四個月，她即恭喜對方，但兩人已很久沒聯絡。

張兆輝單眼捧場

至於割眼瘡不久的張兆輝，左眼貼紗布到場，問到是否因為《狙擊》偷看別人沖涼？他笑言只是污糟嘢入眼。至於前來捧場的熊黛林（Lynn）表示將出席巴黎時裝周，又透露在黃百鳴的賀歲片中，跟內地男星于波飾演一對。另外，青雲及古仔昨日穿上戲服，偕心潔等到北京谷戲。