有傳身家逾半億的張兆輝，昨日出席電影首映前，獨自到中環割眼瘡，離開時左眼更包住紗布，其後搭港鐵離去，盡顯平民化一面。事後，輝哥笑言曾患青光眼，左眼被撞傷和捱插，多災多難！

張兆輝昨午到中環眼科中心做手術割眼瘡，左眼包住紗布兼戴上墨鏡。

傳身家逾半億的張兆輝前往搭港鐵，生活平民化。

七月已生眼瘡的張兆輝因趕拍《神鎗狙擊》遲遲未做手術。

張兆輝昨日趁颱風「天兔」離港，於下午約三時半獨自到中環一間眼科手術中心割眼瘡。戴黑超、穿白Tee牛仔褲的他，相隔約45分鐘後，左眼多了片大紗布離開，但他一臉輕鬆，還邊行邊講電話，行到半路更索性停低慢慢講，然後往乘港鐵。

昨日輝哥透過電話表示早於7月拍西片《Cyber》時已生眼瘡，但當時忙於拍劇集《神鎗狙擊》及電影《逃出生天3D》，無暇做手術。因眼瘡愈來愈大粒，故必須抽空去割，昨晚亦包住左眼出席《逃》片首映。曾患青光眼的輝哥笑言左眼「多災多難」，多年前不但被撞傷，其後做Facial時又被老婆插眼。

有傳經營美容生意的輝哥身家逾半億，問到為何搭港鐵？他解釋司機放假：「唔好咁講，會畀人笑，人哋一百幾十億都冇出聲，呢啲只係帳面上嘅數，唔係真係袋落袋，大把人有半億身家，等我搵到一百幾十億先出聲啦！」

8號波帶挈收視升

另外，因前晚懸掛8號風球，帶挈無綫節目收視飆升，《超級無敵獎門人終極篇》平均收視36點，《May姐有請》也錄得歷來最高的28點，劇集《情逆三世緣》大結局平均有36點，最高達37點。雖然颱風夜成績好，但上周四中秋夜則收視慘淡，《情》劇最高僅20點，《神鎗狙擊》最高亦只有21點。