主力內地掘金的藝人陳浩民特別請假返港「待產」，照顧臨盆在即的太太蔣麗莎，昨日趁中秋節翌日假期往歎茶「追月」。期間浩民忙照顧大病初愈的囡囡雅薷，又要(目及)實挺着巨肚的太太，卻愈忙愈開心。

陳浩民「一家四口」到童裝部Shopping。

剛病愈的囡囡雅薷，好奇地打開購物袋細看。

陳浩民與挺着巨肚的蔣麗莎及女兒到銅鑼灣歎茶。

抱着囡囡父愛大爆發的陳浩民，拿着不同公仔與囡囡耍樂。

據知蔣麗莎計劃下周剖腹分娩，陳浩民遂趁完成一部內地電視劇拍攝工作，即向經理人公司申請停工一個月，中秋前返港照顧家中大小，人月兩團圓。浩民昨午偕妻女及兩名女親友出動，到銅鑼灣一間酒樓歎茶，食飽後即到商場Shopping，一家人樂也融融。日前發高燒入院的囡囡雅薷看來已病愈，顯得相當活躍，喜歡黐着父親並拿他的手機狂篤，又不時要求落地奔跑，趣致可愛，浩民亦樂得與囡囡追追跑跑。而腹大便便的蔣麗莎行動尚算靈活，只間中用手托着巨肚，身旁的浩民亦不時伸手攙扶。顧得大時又要湊住細的，浩民可謂忙得裙拉褲甩。

不怕囡囡呷細佬醋

當發現有記者在場時，浩民夫婦並未影響雅興，蔣麗莎大方向記者說：「我太瘦，胎又太大，至今已量得BB有八磅多，醫生擔心我難產，建議我開刀，我也擔心他。（醫生證實今胎是男嬰？）這幾天會突然跑出來。」

將再做老竇的浩民表示，待BB出世後才決定改甚麼名字，又爆老婆意向是餵母乳。當問到會送甚麼獎勵太太，他即幽默地說：「仲送？佢送咗個女畀我，我依家咪送番個仔畀佢囉！（擔心囡囡呷醋？）咁又唔會，佢仲經常指住媽媽個肚叫弟弟添！」一行人其後繼續Shopping，浩民夫婦最後選購了一對BB鞋，囡囡雅薷亦乖巧主動幫手提取，逗得父母由心笑出來。