女子組合Super Girls（SG）成員Yanny（陳穎欣）最近獲日本大型服裝品牌垂青，邀她成為亞洲區唯一一個代言人，日本之行更被心儀攝影師迷到面紅紅，幾乎忘記一班好姊妹拍檔。

撇甩好姊妹的Yanny獨領風騷，拍攝時表情多多交足戲。

獲永久贊助服飾的Yanny，興奮地展示勝利手勢。

Yanny對眼睛小小的攝影師（左）嗒晒糖，故於日本全程面紅紅。

難得到日本工作的Yanny，投入工作之餘亦順道暢遊當地。

首次以個人身份擔任日本大型服裝品牌代言人的Yanny（陳穎欣），早前特別飛往日本進行拍攝工作，是她首次跟SG四位好姊妹在外地分開工作，她說：「抵達後同客戶見面、開會，最初係有啲唔慣！」但正式拍攝當天，Yanny將所有好姊妹拋諸腦後，全因她已被攝影師迷倒。

Yanny一直視方大同為偶像，而這次的攝影師同是眼睛小小的，剛好是其喜歡的男生類型，故Yanny很快就跟大家打成一片，化妝師還拿她開玩笑說：「Yanny可以唔使搽胭脂啦，因為佢喺拍攝過程中，塊面總係紅紅的，大概係見到攝影師怕醜啩！」她聞言即傻傻大笑。

掃衫唔使錢　

今次是該品牌第一次邀香港藝人代言，Yanny更是亞洲區唯一一位，她說：「客戶好好，喺拍攝現場將一個角落變成一個小型Cafe，有專人整唔同飲料，仲有各式各樣嘅便當、小食，好似做咗貴賓咁，受到好好嘅照顧！」Yanny更成為品牌的「超級VIP」，獲永久贊助服飾，她說：「喺服裝方面可以慳唔少。（會唔會益吓隊友？）會試吓幫佢哋爭取，今次同唔同國籍團隊合作，真係大開眼界，獲益良多！」