通訊事務管理局裁定無綫電視違反「反競爭條款」，大批電視藝員及各大唱片公司歌手將受影響，曾志偉指現時才追究有點過時，又以「一夫一妻」制的比喻，力撐TVB，相反已跟無綫反目的陳鍵鋒則表示「幾開心」，認為藝員應可在不同電視台亮相。

志偉力撐無綫做法無可厚非。

陳鍵鋒剛與女星江語晨合作拍攝內地劇，發展順利。

通訊事務管理局昨日裁定無綫違反「反競爭條款」，今次結果牽連甚廣，大批電視藝員及各大唱片公司歌手將受影響，而演藝界人士則有不同意見，在娛樂圈打滾多年的曾志偉與無綫關係良好，認為事件始於2009年，現在才追究有點過時：「聽講TVB將有行動，以藝人立場觀察，呢幾年好多嘢都變咗，訪問唔可以用廣東話、掛咪、歌手唔可以上其他台，都改變咗，作為老闆唔想藝員去其他台係無可厚非，其實係因為冇競爭對手，一夫一妻制咁，你得一個老婆梗係成日叫你返屋企，如果係一夫多妻，老婆點敢成日叫你返？」

應尊重合約

無綫合約藝人黎耀祥，他不認為無綫壟斷：「簽咗合約冇理由幫其他公司做嘢，唔可以用廣東話接受其他台訪問都合理，始終係娛樂節目，唔應該協助其他台。（內地劇喺其他台播要配音。）咁係迎合內地市場，咁想聽我就睇無綫囉！」蔡少芬與無綫仍有部頭合約，她說：「既然同無綫有約，唔參與其他台演出係好正常。」向來聽話的花旦鍾嘉欣表示一切交由公司安排：「咁大間公司，有自己嘅政策。」與無綫有約的藝員馬賽、薛家燕及錢嘉樂均認為應尊重合約精神。

此外，身為演藝人協會秘書長的陳芷菁昨日就事件作出個人回應：「這是一個自由的社會，很多事情都是你情我願。我曾經離開過，還是覺得TVB整體配套最好。」

讚正視問題

相反，無綫舊將陳鍵鋒當年傾續約時有指因數十元爭持不下，近年他以自由身在內地拍劇，發展不俗，他坦言得悉事件後「幾開心」：「終於有人踏出第一步正視呢個問題，當年覺得合約唔公平，唔開心會影響演出，情緒真係有問題！好多藝員仲去唔到最低工資，但為出鏡無奈都要簽。（覺得為自己平反？）我冇嬲，奉勸新人簽約要睇清楚。」

他又認為香港娛樂圈生態奇怪，藝人價值應由市場主導：「無綫壟斷捧邊個，係咪代表呢個人有最高收視保證？至於唔可以用廣東話，睇都覺得奇怪啦！電視台胸襟應該大啲。」