陳展鵬和蕭正楠（Edwin）昨日回到母校宣傳新劇《巨輪》，表示會盡力爭取好收視，談到卡士未夠強勁，展鵬說：「係講整體嘅！」而Edwin則希望該劇能奪得「最佳劇集」，但女主角鍾嘉欣卻沒有爭獎的野心！

嘉欣（右）宣傳新劇時和李亞男老友鬼鬼，又攬又錫！

Edwin和展鵬重回母校，自然不少得與一班師弟妹合照！

張繼聰自稱未去過蘭桂坊，結果被李璧琦踢爆講大話。

藝人陳展鵬、蕭正楠（Edwin）、鍾嘉欣、張繼聰、田蕊妮和李璧琦等，昨日在長沙灣一間小學宣傳新劇《巨輪》，原來這是展鵬和Edwin的母校，他們更是同級同學，非常有緣！

近期無綫的兩線劇都收視平平，似乎大製作的《巨輪》會成為收視救星，一眾演員在受訪時都表示有信心，展鵬說：「套劇好有戲味，相信觀眾會有共鳴！（卡士唔夠？）係講整體嘅，呢排細Budget（成本）嘅電影先爆！」而相隔10多年再次回到母校的Edwin，解釋因不識路而遲到：「我係車盲，冇GPS好多地方都唔識去！（咁緋聞女友何傲芝屋企呢？）邊度？佢經常搬屋！」問到會否期望憑此劇而得獎，他說：「希望拎『最佳劇集』啦！」

而嘉欣則透露在劇中會飾演沙士病人：「係我入行以嚟最醜！個妝好恐怖，講嘢好似喪屍咁！」臨近台慶時有劇出街，一般會增添得獎成數，不過嘉欣卻以平常心看待：「冇睇得個獎咁重，觀眾鍾意套劇就開心！」

張繼聰「唔去」蘭桂坊

至於張繼聰則向在場的小學生講述1993年元旦日的蘭桂坊人踩人事件，竟笑說未去過蘭桂坊，勸同學不要去，即被司儀李璧琦寸：「各位同學要學識唔好講大話！」場面搞笑！