容祖兒（Joey）宣布跨年演唱會加開至13場！為慶祝打破個人紅館紀錄，加推全新性感造型個唱海報，穿上低胸束衣變身甜筒妹的她，玲瓏身材惹人垂涎！當被取笑男友劉浩龍最清楚其胴體時，天后即變怕醜妹，只懂「冧笑」避談。

容祖兒化身性感甜筒妹，造型大膽。

Joey為即將於廣州舉行的《容祖兒廣州MOOV Live》音樂會綵排。

Joey被取笑甚麼也被男友劉浩龍睇晒。

天后Joey昨日為本月23日於廣州舉行的《容祖兒廣州MOOV Live》音樂會綵排，她說：「呢個騷會同管弦樂團合作，係個大製作！」而今年推出第31張個人唱片的她，風騷宣布年底跨年的《ageas富通保險 1314容祖兒演唱會》第三次加場，更突破了上次的12場紅館個唱紀錄，她說：「加開1月2、3、4號3場。（咁29、30號會唔再加？）或者會抖一抖。」

提到加場海報，身穿火紅束衣的她穿低胸裝及騷長腿，手和腳都沾了忌廉，造型可愛又冶艷，Joey說：「仲有一個造型仲誇張，諗過做第一張宣傳海報，但我接受唔到。（係超底線？）係好低，唔係引大家，或者再加場先出呢張啦！」問到男友劉浩龍可接受她這個火紅甜筒妹造型？她笑說：「佢乜都接受到！」問到是否「乜都畀男友睇晒」？Joey即大發嬌嗔笑說：「人哋女仔嚟o架！（送張畀男友？）曬（相）都曬畀自己先啦！」

撐黃偉文愛樂壇

對於專欄作家李純恩發表的「樂壇已死」論及批評填詞人水平低，引起填詞人兼好友黃偉文（Wyman）不滿，以致兩人在微博互罵，Joey表示尊重前輩的言論自由，但仍撐Wyman：「點定義樂壇已死先？如果話呢個言論會令努力緊嘅人唔開心，大家都鍾意佢（Wyman）嘅作品，呢行已死，唔通我唱十幾場演唱會係神功戲？」問到是否Wyman對號入座？她覺得這是他愛樂壇的表現，又覺得時代不同，現在不可跟昔日比較。此外，音樂人陳奐仁昨日錄影節目時亦表態支持Wyman，他說：「佢批評時要列出例子，解釋邏輯同文法上嘅破綻。（批評填詞人係文盲喎？）咁佢邏輯上有少少破綻，文盲係寫唔到歌嘅！」