陳柏宇（Jason）繼上星期被威吔「戚袋袋」嘗男人最痛後，前晚更血濺中環，認真黑仔！電影《喜愛夜蒲3》前晚在中環拍攝護花場口時，Jason不幸被道具玻璃樽扑頭見紅，要即場洗傷口，搞到拍檔許亦妮嚇到喊驚！

被圍
谷爆事業線的許亦妮，被幾個男仔夾住甩唔到身。

護花
陳柏宇挺身護花，惹來玻璃樽扑頭。

扑頭
紋身漢手起樽落，玻璃碎片四濺，陳柏宇遭爆樽，面露痛楚。

療傷
陳柏宇受傷後即脫去上衣印血水，而導演錢國偉等見出事，即上前替陳柏宇清洗傷口。

許亦妮被嚇到乸埋口面！

電影《喜愛夜蒲3》前晚在中環擺花街拍攝一場護花戲份，主角陳柏宇、許亦妮及關楚耀等演員均有現身。開始拍攝時，谷盡四吋事業線兼露腰的許亦妮，拿着安全套及水樽步出便利店，突然殺出兩名演員左右夾攻，Jason見狀即上前護花，不過卻護花護出禍，慘被金毛飛爆樽扑頭，更一時失手變成「假戲真做」，Jason即時見紅掛彩，認真慘情！

現場所見，演員埋位前已試足四次位，以策安全，到正式埋位時，為遷就鏡頭角度而拍足三次，可惜當拍到第三次扑頭場面時，Jason「臨尾香」不幸被道具玻璃樽扑頭，即時見紅，導演錢國偉見場面如此「逼真」，即收貨嗌Cut機。Jason血濺中環，錢國偉及工作人員急急上前了解，又幫他用水淋頭清洗傷口，他用毛巾掩住傷口時更印出血水。同場的許亦妮見狀，被嚇到乸埋口面，更驚驚拍心口。雖然眾人緊張Jason傷勢，不過他卻處變不驚，洗傷口時更即場剝衫，露出背脊大片紋身兼內褲邊，Man爆表現加上六舊腹肌，反而令更多途人駐足觀看。

受傷堅持開工

事後Jason接受電話訪問時說：「感覺上好似係大件事，其實係小事，只係髮腳尾流咗少少血，唔會有疤，唔會有陰影。之前我拍MV，都試過拍扑頭戲，不過當時冇發生咩事。（女友膽心傷勢？）佢話要『扑』番『扑』我嗰個。」而錢國偉則大讚Jason專業：「我都覺得唔好意思，冇諗過會拍拍吓變真，不過Jason只係皮外傷，個傷口得手指甲咁細，唔使入醫院，不過佢好專業，受咗傷都堅持繼續拍。」

第一手消息請下載on.cc東方互動iPhone/iPad/Android Apps