歌手區文詩（Angela）上周與唱片公司高層「開拖」，氣難下的她在個人網誌力數對方16宗罪兼爆粗洩憤，最終被公司老闆「雪藏」致損失六位數！不怕形象受損的Angela有意提前解約「鬆人」。

Angela今次被公司掟入雪櫃，估計將損失六位數。

身在美國的Angela不忘影靚相，看來心情未受影響。

揚言不靠唱歌搵食的Angela，開懷大擦美食。

Angela與唱片公司老闆兒子張人丰（右二）往紐約。

月前Angela因擅自將公司機密公布以致被「照肺」，自覺沒有做錯的她因高層一句「再係咁Hold起你張唱片」而與對方「吵大鑊」。真性情的Angela氣難下終在Facebook以200字「真言」列出對方16宗罪：如「小人、卸膊、口賤」等字眼，有網友讚她中文水準高，Angela爆粗說：「係呀！特別係X人嗰陣時。」其唱片老闆張國林得悉同事被鬧，終下令將Angela掟入雪櫃。

與同事意見不合

原本Angela接下多個商演及廣告活動，加上年底推出唱片及迷你音樂會，保守估計她損失六位數！身在美國的Angela前晚在電話承認與同事意見不合，她說：「Facebook文章純粹情感抒發。」隨即透露此行與老闆兒子張人丰同行：「只係同一小撮人夾唔到，有諗過解約，等月底返公司坐低慢慢傾，希望可以和平解決。」

呂珊寸EQ低

視唱歌為興趣的Angela大口氣說：「我開舖頭、做電台主持，唔係靠唱歌搵食，唔出唱片唔會死。（公司雪你？）佢哋管唔到我，公司冇畀工作我，雪唔雪冇太大分別。」對於爆粗一事，她以「I think it's not a big deal」及「So What」回應，並說：「要用粗口對付一個同事，可想而知我有幾嬲。」身為唱片公司總經理黃先生則說：「同事係同Angela有爭拗，依家停晒佢嘅工作，老闆希望佢咪一錯再錯，老闆勁嬲，覺得唔尊重同事。」而環星一姐兼與老闆傳緋聞的呂珊不留情寸Angela EQ低：「講粗口鬧人梗係唔要得啦！潑婦罵街咁，做藝人咩時間都要有高EQ。」