天后容祖兒（Joey）昨日宣布演唱會加開除夕和元旦兩場，與歌迷一同迎接2014年！公司高層吳雨送上巨型金豬頸鏈祝賀，Joey笑言自己嫁了給舞台，她又開腔歡迎男友劉浩龍每晚來睇騷。

祖兒坐住華麗大床登場，代表在演唱會上瞓身演出。

戴上巨型金豬頸鏈的祖兒被開玩笑指好生養。

吳雨（左）送上1314支紅玫瑰給祖兒，相當壯觀！

樂壇天后容祖兒（Joey）昨日舉行《ageas富通保險 1314容祖兒演唱會》記者會，宣布除原定12月21至28號8場以外，現加開12月31日及2014年1月1日兩場，即共10場，讓歌迷與Joey共度除夕和新年。Joey以一襲高貴紅色Tube Dress大晒事業線，並坐在華麗大床登場，象徵在演唱會瞓身演出，「1314」寓意她承諾在舞台上一生一世。她透露邀得黃偉文擔任服裝形象設計，而早前她在美國學習新舞步，希望營造更有新鮮感的舞台效果。

撐場的英皇高層吳雨送上一條掛有8隻小金豬的巨型金豬頸鏈，主辦單位即場多送兩隻小金豬，祝賀加場！見Joey一身紅噹噹兼掛住金豬的新娘造型，吳雨笑說：「你結咗婚咩？咁快生咗咁好生養？」她笑指自己嫁了給舞台，其後吳雨送上1314支紅玫瑰，大受感動的Joey說：「呢個世紀應該冇人會再送過千支玫瑰，如果唔係大哥送會仲浪漫！」

歡迎晚晚「蜜」會

冠名贊助的保險公司更為Joey度身訂造「1314萬美元 樂壇天后星級保障」，提供她未來一年在世界各地的演出意外保險，保額價值逾億港元。大會還宣布Joey的第50張專輯《小日子》推出短短半個月，全球銷量已超過四白金成績！

Joey受訪時表示首次在紅館舉行跨年騷，是事業的里程碑：「啱啱喺美國返。（喺嗰邊拍拖？）食吓嘢啫！（男友劉浩龍跟埋跳舞？）跳唔跳得郁都成問題！」談到有報道指她用飛行里數幫男友換機票，她冧笑回答：「應使得使，兩個人去旅行，換分冇蝕底，每人負責一樣嘢，佢負責飲食、交通同埋接放學。」問到她會歡迎還是禁止男友捧場？她說：「咁好睇冇理由禁止！（叫佢晚晚嚟？）到時睇吓點，有朋友支持梗係開心，佢都有幫我手落飛o架！」她又指本來1月1日打算休息參加頒獎禮，但公司讓她當日提早於6時半開騷，演出後可趕到頒獎現場。