影星湯告魯斯（Tom Cruise）愛女蘇莉（Suri）日前整斷手臂，前日與媽咪姬蒂賀姆絲（Katie Holmes）外出時扁嘴騷石膏手，但有指靚佬湯掛住與新歡拍拖，懶理愛女受傷！

姬蒂賀姆絲日前透過發言人公開稱蘇莉手臂受傷，前日蘇莉傷後首次現身與阿媽在紐約外出，右手手臂打上石膏，繃帶上面寫滿朋友的簽名及祝福，其中一句為「不要用石膏打屁股」，相當搞鬼！「獨臂」蘇莉全程以左手拖實阿媽及攬實公仔與毛氈，期間不時皺眉、面露痛苦表情，未知是否因傷口痛而扭計！

新歡投其所好

此外，盛傳靚佬湯單身一年後終覓得新歡，對方為現年29歲的前《體育畫報》（Sports Illustrated）水着女模Jessica White。據悉Jessica早前加入科學教，不時在Twitter留言吸引靚佬湯注意，例如大讚對方在《烈探狙擊》（Jack Reacher）的表現，又稱睇完《大開眼戒》（Eyes Wild Shut）後獲益良多。靚佬湯看罷即自動請纓成為Jessica的私人科學教導師，兩人第一次見面後隨即打得火熱，靚佬湯更將女方介紹給電影監製，助其鋪路加入影圈。

雖然靚佬湯已經透過發言人否認新戀情，但亦有指靚佬湯目前只顧拍拖而忽略蘇莉，連愛女斷手亦不聞不問！