港產男模古天祥（Carlos）、陳駿熙（Mark）及蔡誌恩（Vincent）於模界打滾十年，外表俊朗的Carlos表示曾獲開價30萬照顧，而Mark則大爆Vincent遭行內人傳做「不道德交易」，Vincent則高呼：「男人兩點都好重要！」，自稱不會隨便露點出寫真。

陳駿熙（左起）、古天祥及蔡誌恩在模特兒界十年，經歷了許多趣事！

古天祥（左起）、陳駿熙及蔡誌恩暢談圈中趣事。

古天祥透露在拍《2046》時曾被劉嘉玲喪摑。

由模界踩入影視圈的Carlos、Mark及Vincent，近日出書《VCM》大談十年模特兒生涯。圈中經常爆出女星「飯局價」，而中、西混血兒Carlos直言曾獲「賞識」開價照顧，他笑說：「某間唱片公司話想簽我，試音後隔幾日有個匿名電話打嚟，問我有冇興趣出嚟『做』，話起碼30萬一個月，計落一年12個月咪可以買樓！但最後我婉拒咗。」

男人兩點好重要

問到為何不考慮出寫真？Vincent表示大家路線不同，故未考慮出寫真集：「男人嗰兩點其實都好重要，唔係隨便可以露，要露兩點都要同公司講聲。」Mark又大爆Vincent曾遭行內人瘋傳做「不道德交易」，Vincent聞言後笑說：「因為我鍾意交朋友，識咗啲人就帶出嚟，喺飯局介紹畀人識，所以人哋先會咁覺得。」

談到三子屢與巨星合作，和范冰冰拍廣告的Mark表示曾鬧出笑話：「范冰冰好Nice，嗰次佢問我幾歲，當時覺得講細幾歲冇所謂，就求其話30歲，之後佢問我咩生肖，我唔識計就話自己鬼鬼哋唔識，但佢Feel到我亂講，搞到氣氛好奇怪。（對你有意思？）當時我幾靚仔，都吸引到佢。」而曾拍《2046》的Carlos表示「無辜」被劉嘉玲喪摑：「王家衛非常藝術家，演員要同佢好有默契，當時導演叫我寸嘉玲，點知嘉玲一巴打埋嚟，我呆咗，下意識想還拖，拍咗兩、三分鐘，尷尷尬尬好想快啲完。」