歌手王梓軒近日轉戰電視劇拍攝《飛虎Ⅱ》，首次拍劇的他因角色需要，不惜勤力操肌，他說：「Train咗個幾月，因為劇情入面講我係Fit過飛虎。（要騷肌？）會愈着愈少囉，唔會除晒。」他表示在劇內是奸角：「所以我要漂藍色頭髮，要一望就知係壞人，不過搞到『乸』傷咗個頭皮，而且隻藍色一個禮拜就甩，但都唔敢再染，之後啲顏色都係噴上去。」

王梓軒努力操肌，為新劇作好準備。

王梓軒沒有因拍劇而放棄最愛的音樂。

但梓軒表示沒有放棄最愛的音樂，日前他在商場舉行小型演唱會：「有燈光、音響同200幾個Dancers，好少會放咁多資源喺個藝術節度，我負責打頭陣加壓軸，同埋首次親自設計長達30分鐘、有200幾人嘅快閃表演！」不過他表示因近日經常拍劇捱夜而影響聲帶：「因為同時開緊3個唔同嘅節目，一個係《反斗普通話》、《兄弟幫》同《飛虎Ⅱ》。（精神分裂？）有時會難抽離，其實《反斗普通話》同《兄弟幫》要好搞笑，同埋要自由發揮，所以好有挑戰性！」