陳潔靈（Elisa）、瑪利亞（肥媽）與葉麗儀（Frances）未開騷已傳火星撞地球，有指兩位阿姐聯手對付肥媽，不過肥媽卻以「惡奶奶」身份反擊，笑言要撮合仔仔與Elisa，發動婆媳大戰，實行用歡笑聲踢走不和傳聞！

Elisa與肥媽同屬好玩之人，受訪時竟然搞笑地扮婆媳大戰。

Elisa（左）和肥媽老友鬼鬼，拍攝時笑聲不斷。

肥媽（左起）、葉麗儀與Elisa 即將開騷，笑對不和傳聞。

三位殿堂級天后陳潔靈、肥媽及葉麗儀將於下月5及6日假紅館舉行《3個女人一個墟2013唱過界演唱會》，怎料3個女人一個「嬲」，爆出肥媽不甘拍攝海報時被紅衫的Frances搶鏡及爭輸排位，而在記者會上「冇影」。原來肥媽當日正忙於處理生意事務，更立誓個唱後不再搞生意，專注歌唱事業和陪朋友：「早幾年掛住搞生意，冇理到我啲朋友，今次我買咗200張飛請佢哋睇個唱，喺台上同佢哋講對唔住。之後同我老公專心等大孫拍拖，話唔定我好快會做太嫲同太婆呢！」

着紅衫即入院

而對於爭排位與鬥搶鏡的傳聞，Elisa一笑置之：「唓！呢個一早都估到會傳，你估仲係細路仔玩泥沙咩？我哋都咁大個人囉！」肥媽則自言一向與紅色相沖：「我試過一着紅衫就無端端哮喘入醫院，我唔信邪再着多次，第二次就喺屋企門口仆低，所以呢十幾年嚟都唔着紅色。」

肥媽更將是非當笑話，大搞爛Gag：「不和？係唔和（局）o架啦，我幾大都冧莊落去啦！如果我老公錫佢（Elisa）我就真係要不和啦！」肥媽笑言Elisa轉玩輕口味：「佢要溝我個仔呀，做我新抱，我係譚蘭卿，佢係鄧碧雲，斬崩刀劈扭紋柴，有排鬥呀！」Elisa更提議將「星」級版婆媳大戰呈現舞台，自言孭上金豬扮出嫁新娘，而Frances則扮演和事老。