高海寧昨日化身白髮魔女出席活動，露出一邊香肩，但卻遭羅蘭姐搶鏡！羅蘭姐出場跳舞時不慎甩褲，露出內裏的打底褲，可謂老貓燒鬚！

抽番條褲的羅蘭姐，面不改容地與高海寧及吳卓羲繼續聊天。

羅蘭姐跳舞跳到甩褲，露出一大截打底褲。

藝人羅蘭、吳卓羲與高海寧昨日出席《海洋公園哈囉喂全日祭》，其中高海寧穿上泰山裝扮白髮魔女，她說：「年年都有玩萬聖節，見過有男仔喺鬼屋驚到衝去攬住人，好唔Man！（有冇試過畀人借黑非禮？）我會保護自己，最緊要護胸。（約心儀男仔去？）女仔要矜貴啲，都係等人約好。」

有空檔即溝女

高海寧造型驚艷，卻遭甩褲的羅蘭姐搶鏡！以青花瓷裝上陣的羅蘭姐，跳舞時跳到甩褲，露出內裏的長褲，事後她笑言好彩有打底：「衫上面嘅裝飾太重，我發覺唔對路即刻叉腰，抽住條褲！」

同場的吳卓羲則化身吸血殭屍，問到有否帶心儀對象玩鬼屋，他笑說：「我怕畀記者見到，同埋唔可以乘機博懵o架嘛！」剛於本月2日踏入34歲的他說：「冇時間分幾日食飯，正日同家人、以前嘅Dancer朋友慶祝。（有冇女仔示愛？）冇呀！日日都同田蕊妮開工，佢同郭晉安唔向我試愛就冇o架喇！（成家立室？）盡力啦！一得閒就搵，但我日日都喺TVB開工。（喺TVB搵？）搵錢同搵樓先！（學陳豪做筍盤？）筍盤唔好做呀！太多緋聞。（依家都多緋聞。）所以要刪減啲。」