剛榮升父親的霍啟剛近日忙於「青聯」活動，但也不忘抽空湊仔，並樂在其中，一副慈父口脗的他表示，就算囝囝阻礙他工作，也完全不會厭惡，並自爆換片沖涼樣樣親力親為，全因怕老婆大人他日秋後算帳，做「嫦娥」哦他一世！

霍啟剛精神奕奕地出席活動，提起兒子即眉飛色舞。

霍啟剛與郭晶晶的囝囝上月27日出世，啟剛現時要同時兼顧工作及湊仔。昨晚他出席青年聯會就職禮活動，身為主席的他一早到場招呼賓客，問到是否已習慣做父親？他即眉飛色舞地說：「都習慣，但都係一個星期，覺得好有挑戰性，不過要慢慢上手，好開心，好奇妙。（有冇幫手換尿片同沖涼？）呢啲一定要做，如果唔係老婆會講一世。（有冇雞手鴨腳？）冇，但緊張啲，新生BB頸好脆弱，喺醫院有學過，但返屋企做又唔知啱唔啱。（會唔會擺滿月酒或百日宴？）未清楚，其實都係家人食餐飯，幾時食都得，滿月百日都得。」他又透露BB還未改名，因父親霍震霆不在港，但會在一個月內改，並會催促爸爸加快進度。

薛嘉麟向啟剛取經

有子萬事足的啟剛還自爆昨日在家為活動寫講辭時，被在旁的兒子喊聲打斷，但他完全不覺煩厭：「我寫到一半阿仔喊就要停低氹佢，但好奇妙，原來自己個BB喊，係唔會覺得煩。」他又表示媽咪朱玲玲每日都有為BB拍照留念，因為小朋友的樣子日日都在變，因此要每天記錄下來。

青聯副秘書長薛嘉麟則獨自到場，他透露太太諸葛紫岐現時在加拿大安胎：「預產期係蛇年，但男定女就唔講住。（鍾意仔定女？）最鍾意我太太！（有乜獎勵太太？）呢段時間好辛苦，先體諒做父母嘅辛苦，我除咗獎勵太太，都想獎勵我媽媽。」見他比之前發福不少，他說：「因為陪住太太一齊食嘢，老婆最近胃口轉變，以前唔食魚，依家突然愛上魚。」還表示會請教剛榮升爸爸的霍啟剛意見。問到有否收看與兄長薛世恒分手的陳法拉主演的《衝上雲霄II》？他笑說：「一陣先。」同場還有近期新聞人物盛品儒，但他一早表明不受訪，並低調入場。