百變天后Lady GaGa前晚在倫敦擔任iTunes音樂節表演嘉賓，近一小時的演出中換上多個造型，但都不及她在台上揸刀搶鏡，事後更被網民怒插此舉危險！

前晚GaGa在倫敦北部為iTunes音樂節演出，是她於2月因股傷停工後首個大型表演。雖然她遲到半小時才出場，但無損現場三千名觀眾的熱情。GaGa以全黑蒙面忍者Look、躺在黑色鐵籠現身，唱出新碟《ARTPOP》中從未曝光的歌曲《Aura》。未幾便脫剩閃爆黑Bra，又稱「冇咗你哋，我生存唔到」冧粉絲。

但表演期間，GaGa拿出寫有「Hollywood」字樣的短刀，事後被網民在Twitter留言批評行為瘋狂：「邊個畀佢表演嗰陣拎把刀出嚟？」亦有人舊事重提，指GaGa年前開騷時用咪扑爆粉絲牙齒，今次又揸刀上台，認真「牙煙」！

騷胸趷籮 搞Gag谷新歌

全晚近一小時的演出中，GaGa共演繹七首歌曲，包括《Swine》及《ARTPOP》等，配合多個造型，其中以貝殼比堅尼最性感，晒胸又趷籮！獻唱《Sex Dreams》時，GaGa突然脫掉假髮，並叫粉絲跟住一齊做，之後她突然在台上大講「性經」，吹水吹足三分鐘，相當騎呢！GaGa又搞爛Gag介紹新歌《Manicure》：「對唔住，我唔記得咗去修腳甲，但我有去整指甲！」