昨日開學日，圈中不少星媽紛紛接送子女上學，當中以蔡少芬最為緊張，為了大女張楚兒，除暫停工作外，更暫時把細女信兒交由阿姨照顧，昨日她親自前往接楚兒放學，而紮住辮子的楚兒相當怕醜，只細細聲打招呼。

蔡少芬特別為大女楚兒暫停工作，親自接放學。

蔡少芬教楚兒與老師揮手講拜拜。

歐倩怡被囝囝令山拉着手跳落樓梯，十分搞笑！

邱淑貞次女沈日返學時眼矇矇，似未瞓醒。

早前在內地拍劇的蔡少芬（Ada），為了剛入學、2歲多大的大女兒張楚兒學業，最近急急停工返港親自接送囡囡上學。昨日上午9時許，化淡妝的Ada，帶穿上新校服的楚兒到位於紅磡的幼稚園返學。至11時許，Ada再次獨自接女兒放學，楚兒步出校門時，Ada教她向老師講Bye Bye，楚兒亦相當乖巧，當媽咪着她向在場的記者打招呼時，她即擺出丁字腳，並細細聲嘴郁郁揮手。問到女兒返學驚唔驚？Ada說：「佢梗係唔驚啦！都唔係第一日返學，之前楚兒喺上海有讀過學前班，所以返學冇喊同扭計。反而我驚囉！今日差啲遲到。」問到有否遇上陳慧琳兒子劉昇（蝦餃仔）？她說：「依家呢度得學前班同K1咋！佢應該升咗去九龍塘分校。」至於為何不見老公張晉及細女信兒？她說：「老公要開工，喺大陸做嘢。因為依家送大女返學，成日要出出入入，所以細女暫時畀咗阿姨湊，我依家有兩個鐘頭私人時間。」對於暫時停工陪楚兒上學，Ada說：「唔使開工當然因為個女啦！開學好緊要，個女要有安全感，有媽咪陪住好好多。」

不為加分學樂器

至於郭晉安太太歐倩怡（Cindy）昨日與工人在九龍城接一對子女郭令山及郭以雅放學。下午4時許，哥哥令山步出校門時，興奮得一度跳落樓梯，甫見記者即用手掩面，2歲多大的細女以雅則醒目地向鏡頭揮手。問到兩位小朋友開學日有否扭計？Cindy說：「冇呀！其實都返咗一段時間，妹妹雖然只係返學前班，但有哥哥睇住都好淡定。」鑑於大仔明年升讀小一，問到Cindy有否心水學校？她輕鬆地說：「都係大部分家長心水學校啦！（有冇學嘢加分？）囝囝不嬲學小提琴同溜冰，但唔係為加分而學。」

另外，邱淑貞與沈嘉偉的次女沈日，於昨日早上8時許，在兩名工人陪同下乘七人車到司徒拔道國際學校上課，身穿運動衫的沈日，眼矇矇看似未瞓醒，至於邱淑貞及沈嘉偉則全程未有出現。