劉溫馨捧蛋風騷等簽無綫
劉溫馨在今屆港姐得「梗頸四」殿軍，惟「溫馨失獎、焉知非福」！據知無綫睇中其中央戲劇學院畢業實力，有意即簽即用，隨時唔贏先上岸，更獲無綫高層樂易玲點名力讚，難怪她風騷笑言「好快見」！
劉溫馨外形不俗，又有演出經驗，輸后冠卻贏得無綫垂青！
劉溫馨賽後凌晨回家照戴黑超，在黃埔花園街頭迷路向左走向右走，結果會合親友才上樓。
樂易玲
今屆港姐冠、亞、季軍前晚塵埃落定，現年22歲、得「梗頸四」的劉溫馨，雖然在比賽初期被捧為大熱，但最終與三甲無緣。然而今次失獎卻焉知非福，皆因無綫睇中其甜美外形及演藝實力，加上沒有港姐名銜包袱，有意簽她成合約演員，隨時快過三甲陳凱琳、蔡思貝及劉佩玥率先演出，可謂唔贏先上岸！
戴黑超返閨蕩失路
據知，無綫一眾高層及監製將於本周四（5日）開會，除「必簽」的冠亞季軍外，還會在落選佳麗中挑選合適人選簽約，希望能為將來增添花旦人才，當中畢業於中央戲劇學院、是章子怡及鞏俐師妹的劉溫馨更為重點人選！昨日記者致電無綫製作資源部總監樂易玲，她坦承開會一事，並點名大讚劉溫馨：「今年香港小姐有好多面孔都大為家庭接受，形象入屋，當中劉溫馨好有做藝人嘅材料，我都幾鍾意佢。至於揀唔揀，星期四開會再決定。」
既獲無綫垂青，難怪劉溫馨前晚雖獲「梗頸四」但未見落寞，在賽後受訪時她說：「唔會失望，唔會後悔，好滿意自己表現。（仲充滿自信？）依家都係，都OK有信心！（覺得自己輸咩？）全晚都淨係專注自己身上。（點解輸畀季軍劉佩玥？）我對自己表現滿意，唔想比較，比賽已經完咗，同佢係好朋友。」對於未來發展，她表示可能會修讀碩士或當演員，當被問到會否留在無綫發展時，她似有弦外之音風騷笑說：「未諗，但遲啲可能又好快見呢！想休息吓先。」對於前晚港姐結果，劉溫馨自言有進步空間，並指三甲的表現應該算是好好。
前晚劉溫馨賽後與一眾落選港姐同坐無綫安排的小巴離開，在黃埔花園下車後，在漆黑的凌晨時分戴上黑超及帽的她，似乎蕩失路，多次行錯才找到正確位置，相信該住址並非其家，其後會合在大堂等候的親友後，便立即入電梯背對記者上樓。
