音樂才子倫永亮開騷化身「樂壇判官」,除了騷功架教人作曲外,更寸爆「金曲」《Chok》十分騎呢,擺明「唔畀面」林峯。而表姨甥張繼聰更為表舅父獻出婚後「第一次」,帶同老婆謝安琪歷史性同台獻唱。

倫永亮(右起)、張繼聰及謝安琪同台演出,掀起全場高潮。

倫永亮突然在台上狂扭,演繹林峯的Chok爆甫士。

兩場的《倫永亮ONE VOICE TEN FINGERS演唱會》前晚假伊館開鑼,倫永亮(Anthony)全晚盡騷音樂才華,自彈自唱之餘,更叫在場歌迷出題教作曲,由於撞正日本樂隊安全地帶在灣仔開騷,他笑說:「你買飛嚟睇我真係有Taste,不過我都想盡快完騷,拉大隊去睇玉置浩二。」最後他以一句「睇安全地帶」,即場作曲兼填詞,令全場觀眾拍爛手掌。

笑言照鏡似郭富城

但最爆笑的是他發揮「寸嘴」本色,勁踩莊冬昕的《食軟雪糕》及林峯的《Chok》騎呢難聽,他說:「我個人好主觀,大家有冇啲歌係好『乸』憎聽?我最近聽到啲歌好騎呢!」隨即便配合《Chok》的音樂,演繹林峯的經典Chok爆甫士,在台上狂扭行Catwalk兼放電眼,又對台下的表姨甥張繼聰一家說:「呢啲歌唔係你哋有份呀?唔係就捉你哋上台打靶!」

期間有歌迷大讚Anthony靚仔,他笑說:「我照鏡時都覺得似郭富城,不過有時係盧海鵬Feel。」鳴謝化妝師時,他又自嘲上妝前十足老妖。

演唱會接近尾聲,他邀請張繼聰及化淡妝的謝安琪(Kay)上台合唱,Kay說:「今日真係好歷史性,我同佢喺平時唔會合唱,除咗新人嗰年之後都冇同台過。」最後他們合唱一曲《此情只待成追憶》,掀起全場高潮。