小肥唔怕噓 陳慧敏捱窮

歌手小肥（徐智勇）在澳門樂壇打滾逾十年，星途半浮半沉，直至獲黃柏高（Paco）賞識，正式來港，以藝名「小肥」攻樂壇。苦等十年終於捱出頭，小肥感慨澳門歌手定位不清：「澳門樂壇未及香港配套咁完善，澳門歌手定位模糊，參賽畀人賞識就去表演，表演完就話係澳門歌手，但唱嚟唱去都係人哋嘅歌，傳媒又冇香港咁強，所有嘢積弱，就形成唔到一個市場去推動呢件事。」

對唱歌滿腔熱誠，但當年的小肥深知唱歌在澳門頂多是興趣，不能餬口。他表示最傷心的一次是在台上被喝倒采：「有次澳門雲集兩地歌手同台，啲人好期待香港歌手出場，當時盛傳鄭伊健做香港代表，當觀眾見到澳門歌手就會噓，我出場前一隊Band畀人噓到唱唱吓走咗，到我出場梗係都畀人噓啦！到特別嘉賓馬浚偉出場，唔係鄭伊健，觀眾照噓。」

爭光歌酬升

小肥將噓聲化作動力，簽了一間澳門公司，但投資者卻「走佬」，他說：「嗰時得番間Office，流動資金得萬幾蚊，但有5個歌手要做歌，我哋出盡人情求人幫手，好彩嗰年嚟咗香港發展，公司又接到Job，先過到難關。」來港發展後，小肥在澳門歌迷心目中「升呢」，歌酬急升：「喺香港出完一輪鏡，澳門人覺得我好似為佢哋爭光，好鍾意搵我返去做騷。」

陳慧敏參加無綫歌唱比賽《超級巨聲》出道，雖未有贏得冠軍，但卻出路遇貴人，獲小肥引薦入太陽娛樂，她說：「佢成日喺社交網站上載我哋喺澳門合作嘅片段，之後知道公司有同事好鍾意，就將我推介畀Paco。佢仲話當公司有意簽我後，佢仲猛讚我。」原來慧敏早在大學已聽過小肥大名：「多謝佢，我先有今日。其實我哋喺澳門大學讀同一個系，佢係我師兄，講起唱歌，學校入面人人都識小肥。」　

談到做澳門歌手的辛酸史時，慧敏指多得小肥這位澳門歌手做「開荒牛」來港發展：「全靠佢形成一個平台畀我哋，我係享受嗰一個，多得佢十幾年嘅努力。」她又憶述當年港澳兩邊走，身為學生哥也要孭起貴船飛，生活拮据：「記得當時我渾渾噩噩嚟香港參加《巨聲》，每次搭船、搭車使費好大，試過戶口零蚊，我仲要靠學生貸款度日，慳到水都唔敢買，香港物價指數又高，嗰時覺得好辛苦。」

巨聲Friend收留

久而久之，慧敏在比賽中認識了不少「巨聲幫」好友，例如林欣彤（Mag）等好姊妹都會收留她「宿一宵」：「香港冇地方瞓，好彩巨聲朋友收留我，所以依家我哋都可以咁好朋友，得閒仲會『開枱』。」交通及住宿開支固然大，但作為新人，需要時刻Keep住最靚一面，但慧敏卻經常冇錢買新衫出騷，她說：「試過問朋友借錢買衫出騷，新人狀態要Keep住，好多時做訪問都要執正啲，唔想衰畀人睇。」相信因為這種「不服輸」的心態，所以慧敏一直咬緊牙關，為的就是一圓歌手夢。

後記：耕耘更勝賭博

筆者湊巧在訪問後兩天到澳門旅遊，小肥與慧敏即時發揮好客之道，仔細研究哪一間豬扒包抵食！雖然在「賭城」長大，但二人亦非好賭一族，只會陪香港朋友「朝聖」，小肥說：「太搏殺喇！唔啱我，就算玩都只係玩老虎機，少少錢可以玩成日。」星途如賭博，小肥偏偏無意搏殺翻身，反而默默耕耘，靠靚聲玩足十幾年。